सिन्धुलीको गोलञ्जोर–६ मा एक मतको हारजित, पुनः मत गन्न कर्मचारीले टेरेनन्

काठमाडौं । सिन्धुलीको गोलञ्जोर गाउँपालिका वडा नम्बर ६ मा एक मतको हारजित नतिजा आएको छ । अध्यक्षका उम्मेदवारहरु रबिन कुमार श्रेष्ठ र रोशन श्रेष्ठबीच एक मतको हारजित भएको हो ।

काँग्रेस उम्मेदवार रबिन कुमार श्रेष्ठले ६०९ मत ल्याएर निर्वाचित हुँदा माओवादी केन्द्रका उम्मेदवार रोशन श्रेष्ठले ६०८ मत प्राप्त गरे । एक मतले नतिजा उल्टिएपछि रोशन श्रेष्ठले पुनः मतगणनाका लागि आग्रह गरेका थिए । तर निर्वाचन अधिकृतले पुनः मत गणना गर्न अस्विकार गर्दै रबिन कुमार श्रेष्ठलाई निर्वाचित घोषणा गरिदिए ।
‘मत गणनामै केहि गढबढी भैरहेको थियो, मैले पुनः मत गणनाका लागि आग्रह गरेको थिएँ तर एकैलाौटी रुपले बिजेता घोषणा गरियो’, एक मतले पराजित माओवादी केन्द्रका उम्मेदवार श्रेष्ठले भने ।

उनले आफु अब कानुनी उपचारको बाटोमा अघि बढ्ने जानकारी पनि दिए । ‘मत गणनामा केहि आशंका थियो, मैले पुनः गणना गरौं भन्दा सुनुवाई भएन, अब कानुनी उपचारको विकल्प रहेन’, पराजित उम्मेदवार श्रेष्ठले भने । उनले वडाबासीको सेवा गर्ने आफ्नो चाहनामा मत गणनामा संलग्न कर्मचारीहरु बाधक बनेको आरोप पनि लगाए ।