काठमाडौं । २५ करोड विदेशी नोट अनुसन्धानमा राजस्व अनुसन्धान विभाग र नेपाल प्रहरीबिच मतभेद देखिएको छ । थप अनुसन्धानको क्रममा विभागले नेपाल प्रहरीलाई वाइपास गर्न खोजेपछि तनाव बढेको हो ।
चैत ४ गते राती उपत्यका अपराध अनुसन्धान टेकूबाट खटिएको प्रहरी टोलीले काठमाडौंको टोखाबाट ट्रक ड्राइभर र २५ करोड रुपैयाँ बराबरको विदेशी मुद्रा बरामद गरेको थियो । रकम समातिएपछि टेकू प्रहरीले राजस्व अनुसन्धान विभागलाई थप अनुसन्धानका लागि बुझाएको थियो। वैदेशिक मुद्रा अपचलनमा थप अनुसन्धान गर्ने अधिकार प्रहरीलाई छैन ।
विभागले गाडी चालक कुसाङ लामाको मोबाइल फरेन्सिक रिपोर्टका लागि नेपाल प्रहरीलाई पठाएको थियो । प्रहरीसँग फरेन्सिक रिपोर्टसँगै अन्य सहयोग मागेको थियो । तर प्रहरीले भने अनुसन्धानमा आफ्नो प्रतिनिधि पनि सहभागी हुनुपर्ने आशय राखेको थियो । तर विभागले सो कुरालाई अस्वीकार गरेको विभाग स्रोतको दाबी छ ।
विभाग स्रोतले भन्यो,“प्रहरीले २ मोडेलमा अनुसन्धान गर्न प्रस्ताव गरेको थियो, तर महानिर्देशक चण्डी घिमिरेले प्रहरीको प्रस्तावलाई अस्वीकार गरी सशस्त्र प्रहरीको इन्टिलिजेन्स प्रयोग गर्नुभएको छ ।” स्रोतका अनुसार प्रहरीले पहिलो शर्तमा आफ्नो प्रतिनिधि हुनुपर्ने, दोस्रो शर्तमा पुरै अनुसन्धान प्रहरीले पाउनुपर्ने आशय राखेको थियो । तर सो अनुसार काम गर्न विभागले अस्वीकार गरेको हो । विभाग स्रोतका अनुासर नोट नम्बर सहित मुचुक्का बनाउनका लागि मात्रै विभागलाई ५ दिन समय लागेको थियो ।
यदी यो अनुसन्धान प्रहरीले पाउने हो भने सरकारले नै निर्णय गरेर दिनुपर्ने हुन्छ । यसअघि त्रिभुवन विमानस्थल भन्सार कार्यालय परिषरबाट समातिएको ६० किलो सुन सरकारले निर्णय नै गरेर अनुसन्धानमा प्रहरीलाई प्रतिनिधि राखेको थियो । पछि विभागले सो अनुसन्धान संगठित अपराधमा अनुसन्धान गर्ने भन्दै नेपाल प्रहरीलाई बुझाएको थियो । अहिलेको अवैध नोट अनुसन्धानमा विभागले प्रहरीलाई प्रतिनिधि राख्न अस्वीकार गरेको हो ।
विभागको अस्वीकार पछि प्रहरीले विभागलाई खुलेर सहयोग गरेको छैन । स्रोतले थप्यो, “प्रहरीबाटै आएको अनुसन्धानको थप सहयोग विभागले लिन सकिरहेको छैन, शसस्त्र प्रहरीबाट आएको सूचनाको आधारमा नेपाल प्रहरीलाई दबाब दिन २५ करोडको मालिक भेटिएको भन्दै नारायण पौडेलको नाम सार्वजनिक गरेको हो ।” हाल नारायण पौडेल फरार छन् । पौडललाई पक्राउ गर्न पक्राउ पुर्जी जारी भैसकेको छ । उनलाई पक्राउ गर्न सशस्त्र प्रहरीको क्षमताले मात्रै सक्दैन । किनभने देश भन्दा बाहिरका मान्छे पक्राउ गर्नका लागि इन्टरपोलको सहयोग लिनुपर्छ । यसका लागि प्रहरी अनिवार्य आवश्यक पर्छ । नेपाल प्रहरीलाई दबाब दिनकै लागी विभागले २५ करोडको मालिक भेटिएको बाहिर ल्याएको हो ।
नारायण पौडेल सिन्धुपाल्चोक जिल्ला स्थायी ठेगाना भई हाल काठमाडौं बस्दै आएका छन् । विभाग स्रोतका अनुसार २५ करोड अवैध नोट अनुसन्धानमा विभागले तेस्रो लेयरको समेत सूचना संकलन गरेको छ । तर प्रहरीलाई दबाब सृजना गर्न नारायण पौडेलको नाम बाहिर ल्याएको स्रोतको दाबी छ । अनुसन्धानकै क्रममा २५ करोडको मालिक नारायण पौडेल भएको सार्वजनिक हुनुले प्रतिवादी फरार हुने प्रहरीको तर्क छ ।
प्रतिक्रिया दिनुहोस्