सिमकोट बजार अनुगमन: म्याद गुज्रेका सामग्री बरामद

सिमकोट । हुम्लाको सदरमुकाम सिमकोट बजार सोमबार अनुगमन गरिएको छ । यहाँ सञ्चालित मासु, दैनिक उपभोग्य खुद्रालगायत सामग्रीको अनुगमन गरी म्याद गुज्रेका सामग्री बरामद गरिएको हो ।

बजार अनुगमनका क्रममा विभिन्न पसलबाट रु १५ हजार मूल्य बराबरको म्याद गुज्रेका सामग्री बरामद गरी नष्ट गरिएको उद्योग तथा उपभोक्ता हित संरक्षण कार्यालयका प्रमुख श्रीबहादुर विष्टले जानकारी दिए ।

सडेका मासु, दैनिक उपभोग सामग्रीमा सीमा नाघेका वस्तु, पेयपदार्थ र पत्रुखाना बरामद गरी नष्ट गरिएको उनले बताए ।सदरमुकाम क्षेत्रका ११ वटा पसलमा अनुमगन गर्दा उपभोक्तालाई सामान बिक्रीको बिल नदिने गरेको पाइएकाले सचेत गराइएको विष्टको भनाइ छ ।

जिल्लाभरका स्थानीय व्यापारीले सामग्री बिक्री गरिसकेपछि उपभोक्तालाई अनिवार्य बिल दिने व्यवस्था गर्नुपर्नेमा सचेत बनाए उक्त व्यवस्थाको प्रभावकारी कार्यान्वयनका लागि निर्देशन दिइएको उनले उल्लेख गरे ।

‘तरकारी, मासु, मदिरा, चुरोट, भाँडादेखि लत्ताकपडा सबै एउटै पसलबाट बिक्री गर्दै आएका पायौँ । उपभोक्ताले स्वस्थ खानेकुरा उपभोग गर्न पाउने अधिकार भए पनि यहाँका कतिपय व्ययसायीले नियमविपरीत व्यापार गरिरहेका छन्’ उपभोक्ता हित संरक्षण कार्यालयका प्रमुख विष्टले भने, ‘अधिकांश व्यवसायीले मूल्यसूची नटाँसिएको, लेखापरीक्षण नगरेको, करचुक्ता नभएको, पुँजी कम देखाएर कारोबार गरेको पाइयो । सबैलाई नियमानुसार व्यवसाय सञ्चालनक लागि निर्देशन दिएका छौँ । निर्देशन कार्यान्वयन भएरनभएको बारे आगामी दिनमा पुन: अनुगमन गरी कडाइ गर्नेछौँ ।’

अनुगमनमा जिल्ला प्रशासन, उद्योग तथा उपभोक्ता हित संरक्षण कार्यालय, उद्योग वाणिज्य सङ्घ, सञ्चारकर्मी, सुरक्षाकर्मी लगायतको उपस्थित थियो ।