काठमाडौं । इन्भेष्टमेन्ट कम्पनीलाई लगानी विस्तारका लागि धितोपत्र बोर्डले नयाँ व्यवस्था थप गरेको छ । बोर्डले इन्भेष्टमेन्ट कम्पनीलाई नयाँ क्षेत्रमा लगानी गर्न सहयोग पुग्ने गरी व्यवस्था परिपमार्जन गरेको हो ।
इन्भेष्टमेन्ट कम्पनीलाई नयाँ क्षेत्रमा लगानी गर्न सहज हुनेगरी नयाँ व्यवस्था गरेको बोर्डका सहायक प्रवक्ता तोलाकान्त न्यौपानेले बताए । उनले भने, “पहिले यातायात, संचार र उर्जा भन्ने मात्रै थियो अब लगानीको क्षेत्र थपिएको छ।”
बोर्डको पुरानो व्यवस्था अनुसार थोरै क्षेत्रमा मात्रै लगानी गर्न पाउने व्यवस्था थियो । फेरिएको नयाँ व्यवस्था अनुसार, संगठित संस्था/ लगानी कम्पनी उर्जा, यातायात, संचार, कृषि, पर्यटन, उत्पादन तथा प्रशोधन, सूचना प्रविधि तथा खनिज उत्खनन क्षेत्रको संगठित संस्थाको धितोपत्रमा मात्र लगानी गर्ने गरी स्थापना भएको हुनु पर्नेछ ।
यस्ता छन् अन्य व्यवस्था
संगठित संस्था / लगानी कम्पनी कम्तिमा विगत तीन बर्ष संचालनमा रही पछिल्लो दुई आर्थिक बर्षमा मुनाफा गरेको हुनुपर्ने ।
संगठित संस्था/लगानी कम्पनीको प्रति शेयर नेटवर्थ अंकित मूल्य भन्दा बढी भएको हुनुपर्ने ।
संगठित संस्था/लगानी कम्पनीले उर्जा, यातायात, संचार, कृषि, पर्यटन, उत्पादन तथा प्रशोधन, सूचना प्रविधि तथा खनिज उत्खननसँग सम्बन्धित संगठित संस्थाको संस्थापक शेयर बाहेक अन्य धितोपत्र र प्राथमिक तथा दोश्रो बजार मार्फत धितोपत्र खरिद गर्न नसक्ने ।
तर, योग्य संस्थागत लगानीकर्ताको रुपमा समेत कार्य गर्न बोर्डबाट अनुमति प्राप्त गरेको खण्डमा उर्जा, यातायात, संचार, कृषि, पर्यटन, उत्पादन तथा प्रशोधन, सूचना प्रविधि तथा खनिज उत्खननसँग सम्बन्धित संगठित संस्थाको बुक बिल्डिङ विधिमार्फत् हुने प्रारम्भिक सार्वजनिक निष्काशनमा मात्र योग्य संस्थागत लगानीकर्ताको रुपमा कार्य गर्न सक्ने ।
संगठित संस्था/ लगानी कम्पनी उर्जा, यातायात, संचार, कृषि, पर्यटन, उत्पादन तथा प्रशोधन, सूचना प्रविधि तथा खनिज उत्खनन क्षेत्रको संगठित संस्थाको धितोपत्रमा मात्र लगानी गर्ने गरी स्थापना भएको हुनुपर्ने ।
संगठित संस्था / लगानी कम्पनीले न्यूनतमभन्दा कम्तिमा एक स्तर माथिको क्रेडिट रेटिङ्गको ग्रेड प्राप्त गरेको हुनुपर्ने ।
संगठित संस्था / लगानी कम्पनीको चुक्ता पूँजी कम्तिमा रु. ५० करोड हुनुपर्ने ।
नेपाल सरकार संस्थापक भई स्थापना भएको संगठित संस्था वा उर्जा, यातायात, संचार, कृषि, पर्यटन, उत्पादन तथा प्रशोधन, सूचना प्रविधि तथा खनिज उत्खनन क्षेत्रमा लगानी गर्ने उद्देश्य सहित स्थापना भएको संगठित संस्था / लगानी कम्पनी हुनुपर्ने ।
बैदेशिक लगानीमा स्थापना भएका संगिठत संस्थाले बैदेशिक लगानी तथा प्रविधी हस्तान्तरण सम्बन्धी ऐनको प्रकृया पुरा गरेको हुनुपर्नेछ ।
प्रतिक्रिया दिनुहोस्