काठमाडौं । राष्ट्रियसभाका उपाध्यक्ष विमला घिमिरेले विकासशील र अविकसित राष्ट्रमा दिगो रूपमा गरिबी अन्त्य गर्न चुनौतीपूर्ण बनेको धारणा राखेकी छिन ।
चीनको सियान सहरमा भइरहेको गरिबी न्यूनीकरण र दिगो विकाससम्बन्धी साङ्घाई सहयोग सङ्गठनमा आज सम्बोधन गर्दै उनले शिक्षा, स्वास्थ्य, रोजगारी, खाद्य सुरक्षा र आधारभूत सेवामा पहुँच अभावका कारण दिगो रूपमा गरिबीको अन्त्य चुनौतीपूर्ण बनेको उल्लेख गरेकी संसद सचिवालयले जनाएको छ ।
‘विश्वका एक अर्बभन्दा बढी मानिस चरम गरिबीको रेखामुनि छन्, विशेषत: विकासशील र अविकसित राष्ट्रमा शिक्षा, स्वास्थ्य, रोजगारी खाद्य सुरक्षा र आधारभूत सेवामा पहुँच अभावका कारण दिगो रूपमा गरिबीको अन्त्य चुनौतीपूर्ण बनेको छ’, उनले भनिन् ।
उपाध्यक्ष घिमिरेले क्षेत्रीय शान्ति, स्थिरता, आर्थिक समृद्धि र सामाजिक न्याय प्रबर्द्धन गर्ने एक सशक्त बहुपक्षीय मञ्चको रूपमा साङ्घाई सहयोग सङ्गठनले स्थापनाकालदेखि नै महत्त्वपूर्ण भूमिका निर्वाह गर्दै आएको चर्चा गरिन् । उनले गरिबी निवारण र दिगो विकासका लागि मञ्चले पुर्याएको योगदान, लिएको पहलकदमी र प्रवर्द्धन गरेको सहकार्यलाई नेपालले उच्च मूल्याङ्कन गरेको पनि दोहोर्याइन् ।
प्रतिक्रिया दिनुहोस्