पोषण सेवा विस्तारमा तेस्रो रणनीति, ५ वर्षमा कस्तो बन्छ नेपाल ?

काठमाडौं । राष्ट्रिय योजना आयोगले संयुक्त राष्ट्रसंघीय पोषण सेवा विस्तार अभियान (स्केलिङ अप न्युट्रिसन मुभमेन्ट) को तेस्रो चरण (सन् २०२१–२०२५) को पाँच वर्षे रणनीति कार्यक्रमको सार्वजनिक गरेको छ । राजधानीमा आयोजित एक कार्यक्रमका माझ आयोगका उपाध्यक्ष प्रा.डा पुष्पराज कँडेलले आगामी ५ वर्षभित्र खाद्य सुरक्षा तथा पोषणका सवालमा गरिने रणनीतिक कार्यक्रमको प्याकेज सार्वजनिक गरे ।

सो अवसरमा कँडेलले बहुक्षेत्रीय पोषण योजना–दोस्रो (२०७५/७६–२०७९/८०) को प्रगति समीक्षा गर्दै आगामी आर्थिक वर्षमा उक्त योजना अन्तर्गत सञ्चालन गरिने कार्यक्रमको बारेमा समेत प्रकाश पारे । कार्यक्रममा सरोकारवालाहरू नेपाल पोषण सेवा विस्तार अभियानको सक्रिय सदस्य भएकाले बहु क्षेत्रीय पोषण योजना कार्यान्वयनको साझा अभियानको तेस्रो पाँच वर्षे रणनीतिको कार्यान्वयनमा एकताबद्ध भएर लाग्नुपर्नेमा जोड दिए ।

बहुक्षेत्रीय पोषण योजनासँग सम्बन्धित मन्त्रालय, विभागका साथै पोषण तथा खाद्य सुरक्षा सम्बन्धी विज्ञहरुको समूह, विकास साझेदार निकाय, जेनेभा स्थित पोषण सेवा विस्तार सम्बन्धी विश्वव्यापी अभियानको सचिवालय, निजी क्षेत्र र नागरिक समाज आदिका प्रतिनिधिहरुको सहभागितामा र राष्ट्रिय योजना आयोगका माननीय सदस्य डा.उषा झाको अध्यक्षतामा सम्पन्न गोष्ठीमा पोषण सेवा विस्तार अभियानको तेस्रो चरणको रणनीति सार्वजनिक र बहुक्षेत्रीय पोषण योजनाको समीक्षा भएको हो ।
विभिन्न तह र क्षेत्रबाट सञ्चालन गरिएको पोषण सम्बन्धी कार्यक्रम तथा सेवाहरुलाई विश्वव्यापी रुपमा विस्तार गरी विशेषगरी किशोरी, महिला तथा बालबालिकामा हुने सबै प्रकारका कुपोषणको अन्त्यका लागि संयुक्त राष्ट्रसंघको पहल र सदस्य राष्ट्रहरुको नेतृत्वको अवधारणामा संयुक्त राष्ट्रसंघीय पोषण सेवा विस्तार अभियान सन् २०१० बाट शुरु भएको हो । नेपाल सो अभियानमा सन् २०११ मे मा आवद्ध भएको हो ।