सिंहदरबार संवाददाता
काठमाडौं । कामना सेवा विकास बैंकले काठमाडौं उपत्यका ट्राफिक प्रहरी कार्यालय वित्तीय साक्षरता कार्यक्रम सम्पन्न गरेको छ। बैंकले आफ्नो सामाजिक उत्तरदायित्व कार्यक्रमअन्तर्गत रामशाहपथमा वित्तीय साक्षरता कार्यक्रम सम्पन्न गरेको हो ।
साे कार्यक्रममा ट्राफिक प्रहरीहरूलाई बैंकिङ प्रणाली, बचत तथा कर्जा कारोबार र पछिल्लो समयमा बैंकिङ प्रणालीमा आएका डिजिटल बैंकिङका सम्बन्धमा प्रस्तुतीकरण गरिएको थियो । बैंकका ब्राण्डिङ विभाग प्रमुख सुशील पौडेलले बचतको महत्त्व, दैनिक जीवनमा गरिने बचत व्यवहार, कर्जासम्बन्धी कारोबार, कर्जा अनुशासन तथा डिजिटल बैकिङका महत्त्व, अवसर र चुनौतीका बारेमा प्रस्तुति गरेका थिए ।
साे कार्यक्रममा प्रहरी उपरीक्षक (एसपी) सन्तोष आचार्य, नायव प्रहरी उपरीक्षकहरू, बैंकका कर्मचारी सुमन दुवाडी तथा अन्य प्रहरी अधिकृतहरूको उपस्थिति रहेको थियो । कार्यक्रममा बोल्दै एसपी आचार्यले दैनिक जीवनमा बचत गर्नुपर्ने थाहा भएतापनि कसरी बचत गर्न सकिन्छ भन्ने विषयमा ध्यान दिनुपर्ने बताए ।
यस साक्षरता कार्यक्रमपछि आफ्नो दैनिक जीवनमा बचतको महत्त्व बुझेर बचत बानीको विकास गर्न ट्राफिक प्रहरीहरूलाई हौसला मिलेको उनले बताए । बैंकले हाल देशभर विभिन्न स्थानमा रहेका १ सय ३५ वटा सञ्जाल, ७७ एटिएम बुथ तथा अन्य शाखारहित बैंकिङ सञ्जालमार्फत आफ्नो अत्याधुनिक बैंकिङ सेवा प्रदान गर्दै आएको छ ।
प्रतिक्रिया दिनुहोस्