श्रमिकको साथी श्रमिक नै हुनुपर्छ- महासचिव पदका उम्मेदवार सन्तोष खड्का

काठमाडौं । गैरआवासयि नेपाली संघ रअन्तर्राष्ट्रिय समन्वय परिषद् (एनआरएनए) दक्षिण कोरियाको चुनाव नजिकिँदै छ । निर्वाचनमा उम्मेदवारी दिँदै विभिन्न आकांक्षीहरुले आफूले जित्ने दाबी गर्दै चुनावी प्रतिस्पर्धामा होमिएका छन् । यसैबीच महासचिव पदमा उम्मेदवारी दिएका कोरियामा चिरपरिचित सन्तोष खड्काले मतदाताको आकर्षणको केन्द्र आफू रहेको दाबी गरेका छन् ।

रामेछापमा जन्मिएर कोरियालाई कर्मभूमि बनाइ सक्रिय सामाजिक अभियन्ता एवं सक्रिय सञ्चारकर्मीका रूपमा आफूलाई स्थापित गरेका खड्काले विद्यार्थी र श्रमिकहरुको प्रतिनिधित्व गर्दै एनआरएनए २०२३–०२५ का लागि महासचिव पदमा उम्मेदवारी दिएका हुन् ।

नेपाली समाजमा निकै परिचित उनी हाल नेपाल पत्रकार महासंघ दक्षिण कोरिया शाखाका वरिष्ठ उपाध्यक्ष, रामेछाप सम्पर्क समिति दक्षिण कोरिया, नेपाल तराई समाज दक्षिण कोरियालगायत आधादर्जन संघ–संस्थाहरुका सल्लाहाकारसमेत छन् । कामदार दैनिकका सम्पादकसमेत रहेका उनी सेवा प्रवाह, मकै हाउस अनलाइनलगायत आधा दर्जनभन्दा बढी प्रतिष्ठित सञ्चार गृहमा अतिथि सम्पादकको रूपमा समेत कार्यरत छन् ।

‘मोटिभेसन’ वक्ताको रूपमा समेत आफ्नो छुट्टै पहिचान बनाएका खड्काले भारत, थाइल्यान्ड, कम्बोडिया, लाओस, दक्षिण कोरिया, फिलिपिन्सलगायत बिभिन्न देशहरूमा ‘मोटिभेसनल’ वक्ताका रूपमा आफ्नो प्रस्तुति दिइसकेका छन् । कोरियाको प्रतिष्ठित हान्याङ विश्वविद्यालयबाट अन्तर्राष्ट्रिय अध्ययनमा स्नातकोत्तर गरेका उनी हाल विद्यावारिधी अध्ययनरत छन् ।

विभिन्न सम्मेलनहरुमा धेरैपटक कोरिया आइसकेका उनी निरन्तर रूपमा भने अध्ययनको सिलसिलामा २०१३ देखि स्थायी रूपमा कोरियामा बसोबास गरिरहेका छन् । आफू विद्यार्थी र श्रमिक दुवै भएकोले विद्यार्थी र श्रमिकहरुको हकहितका लागि आफ्नो मुख्य प्राथामिकता हुने बताउँदै आफ्नो कार्यकालमा नारामा हैन साच्चिकै एनआरुएनए विद्यार्थी र श्रमिकमैत्री हुने बताए ।

सन्तोष खड्काले सार्वजनिक गरेका आफ्ना नीति र चुनावी एजेन्डाहरु यस्ता छन्

–खड्काले श्रमिकको साथी साथै श्रमिक नै हुने र आफू पनि श्रमिक भएकाले आफ्नो उम्मेदवारी रहेको जनाएका छन् । यस्तै उनका अन्य सार्वजनिक नीति तथा एजेन्डाहरुमा महिनाको चारवटै आइतबार र रातो बिदामा पनि नेपाली राजदूतावासको सेवा दिनका लागि आफ्नो पहल रहने उल्लेख गरेका छन् ।

–नेपाली राजदूतावास र एनआरएनए को संयुक्त आयोजनामा भइरहेको पासपोर्ट नवीकरण र अन्य विविध सेवासहितको घुम्ती सेवालाई निरन्तरता दिइ अझ प्रभावकारी र सबैको पहुँचमा पुर्याउने, महँगो भाडा दरको स्थायी समाधानका लागि सम्बन्धित पक्षसँग छलफल गरी राष्ट्रिय ध्वजाबाहक नेपाल एयरलाइन्सलाई कोरियादेखि नेपालसम्म सीधा उडानको लागि सम्बन्धित निकायसँग पहल गर्ने उनको सार्वजनिक एजेन्डा छन् ।

कोरियामा नेपाली भाषा, संस्कृति एवं रितिरिवाजको प्रवद्नका निमित्त कोरियाली विद्यालयहरुमा नेपाली भाषा, संस्कृति एवं रितिरिवाजसम्बन्धी कक्षा सञ्चालनका लागि सम्बन्धित पक्षसँग पहल गराउने कुरालाई उनले आफ्ना एजेन्डाहरुमा समावेश गरेका छन् ।

–यस्तै कोरियामा उच्च शिक्षाका लागि आउने नेपाली विद्यार्थीहरुका समस्या समाधान, भाषागत तथा कानुनी परामर्शसम्बन्धी समस्या समाधानका लागि विगतमा पनि प्रयास रहेको र यदि आफू महासचिव पदमा निर्वाचित भए आफूले गरेका यी सबै बाचा पूरा गर्ने प्रतिबद्धता खड्काले जनाएका छन् ।

–आफ्ना चुनावी निति एवं एजेन्डा सार्वजनिक गर्ने क्रममा खड्काले आफूले कुराभन्दा काम गर्न जानेको हुँदा आफ्नो पक्षमा मत खस्ने विश्वास दिलाएका छन् ।