तातोपानी कुण्डको एक वर्षकाे आम्दानी १ करोड ३७ लाख आम्दानी

म्याग्दी । प्राकृतिक उपचारस्थलको रुपमा परिचित म्याग्दीको सिङ्गा तातोपानी कुण्डमा एक वर्षको अवधिमा १ करोड ३७ लाख रूपैयाँ आम्दानी भएको छ । आर्थिक वर्ष २०७९/८० मा प्रवेश शुल्कलगायत विभिन्न शीर्षकमा सो आम्दानी भएको हो ।

म्याग्दी नदीको किनारमा प्राकृतिक रुपमा निस्कने ५० डिग्री सेल्सियस तातोपानी सङ्कलन गरिएको तलाउमा स्नान गरेर उपचार र अवलोकनका लागि तातोपानीमा आउने पाहुनाले तिर्ने प्रवेश शूल्क आम्दानीको मुख्य स्रोत हो । कुण्ड व्यवस्थापन समितिका अध्यक्ष कृष्ण खड्काले भने, “बिरेनुनको गन्ध नआउने पानी सङ्कलन गरिएको पोखरीमा स्नान गरेर छाला, ग्यास्ट्रिक, वाथ, चोटपटक लागेको लगायत निको हुने गरेको छ ।” गत आर्थिक वर्षमा १८ हजार २०८ जनाले स्नान गरेका थिए।

बिरामीले स्नान गर्ने कुण्डमा प्रवेश शुल्कबापत ६२ लाख ९७ हजार रूपैयाँ र पाहुनाले स्नान गर्ने कुण्डबाट २५ लाख ८८ हजार रूपैयाँ आम्दानी भएको छ । चन्दाबापत ४ लाख १६ हजार रूपैयाँ, मन्दिरको भेटी ५ लाख ३० हजार रपैयाँ, आजीवन सदस्यताबाट ३ लाख आठ हजार रूपैयाँ तथा ब्याजबाट १७ हजार रूपैयाँ आम्दानी भएको छ ।

प्रवेश शुल्क र चन्दा सहयोग बापत उठ्ने रकममध्ये २५ प्रतिशत बेनी नगरपालिका र १३ प्रतिशत आन्तरिक राजस्व कार्यालयमा कर बुझाउने अध्यक्ष खड्काले बताए। तातोपानी सङ्कलन गरिएको तलाउमा एक पटकमा तीन सय ५० देखि चार सय जनाले स्नान गर्न सक्ने क्षमता छ । सात दिन स्नानका लागि प्रतिव्यक्ति तीन सय ५० रूपैयाँ शुल्क तोकिएको छ । बिरामी र छोटो अवधि स्नान गर्नेका लागि फरक फरक कुण्ड छन् ।

अध्यक्ष खड्काका अनुसार कुण्डको आम्दानीबाट तातोपानीको सरस्वती माविका ६ निजी शिक्षकको तलबका लागि १३ लाख ६४ हजार रूपैयाँ उपलब्ध गराइएको छ । कुण्डका कर्मचारीको तलबमा ११ लाख ३३ हजार रूपैयाँ, संरचना निर्माण र मर्मतमा दश लाख ८९ हजार रूपैयाँसहित कुल १ करोड ३६ लाख १९ हजार रूपैयाँ खर्च भएको छ । आर्थिक वर्ष २०७८/७९ मा १ करोड १७ लाख २२ हजार रूपैयाँ, आव २०७७/७८ मा ७८ लाख एक हजार रूपैयाँ, आव २०७६/७७ मा एक करोड १३ लाख ४९ हजार रूपैयाँ, आव २०७५/७६ मा ९९ लाख ४२ हजार रूपैयाँ तथा आव २०७४/७५ मा ६५ करोड छ लाख रूपैयाँ आम्दानी भएको थियो ।

यस्तै आर्थिक वर्ष २०७४/७५ मा २६ लाख ५७ हजार रूपैयाँ, आव २०७५/७६ मा ९६ लाख १० हजार रूपैयाँ, आव २०७६/७७ मा एक करोड १४ लाख २३ हजार रूपैयाँ, आव २०७७/७८ मा एक करोड १४ लाख ५२ हजार रूपैयाँ तथा आव २०७८/७८ मा एक करोड ९० लाख ५६ हजार रूपैयाँ खर्च भएको छ ।