१२ पालिकामा १६ करोड बढी बजेट कटौती

गुल्मी । गुल्मीका १२ पालिकामा १६ करोडभन्दा बढी बजेट कटौती भएको छ । संघीय सरकारले वित्तीय समानीकरण अनुदानअन्तरगत बजेट कटौती गर्दा जिल्लाका पालिकाहरुमा १६ करोड १७ लाख ५० हजार रूपैयाँ बजेट कटौती भएको कोष तथा लेखा नियन्त्रक कार्यालयका प्रमुख छविन्द बेल्वासेले जानकारी दिए । दुई नगरपालिका र १० गाउँपालिका गरी १२ पालिका रहेको गुल्मीमा सबैभन्दा धेरै रेसुङ्गा नगरपालिकामा १ करोड ६३ लाख ८७ हजार पाँच सय रूपैयाँ बजेट कटौती भएको छ ।

त्यस्तै मुसिकोट नगरपालिकामा १ करोड ५९ लाख ५० हजार रूपैयाँ बजेट कटौती गरिएको छ । गाउँपालिकामध्ये इस्मामा १ करोड २६ लाख ५० हजार रूपैयाँ, गुल्मी दरबारमा १ करोड ३३ लाख २५ हजार रूपैयाँ, कालीगण्डकीमा १ करोड १९ लाख ७५ हजार रूपैयाँ, चन्द्रकोटमा १ करोड ३२ लाख ८७ हजार पाँच सय रूपैयाँ बजेट कटौती भएको छ ।

त्यसैगरी छत्रकोटमा १ करोड ३१ लाख २५ हजार रूपैयाँ, धुर्कोटमा १ करोड ३३ लाख ७५ हजार रूपैयाँ, मदानेमा १ करोड २९ लाख ८७ हजार रूपैयाँ, मालिकामा १ करोड २८ लाख ७५ हजार रूपैयाँ, सत्यवतीमा १ करोड ३६ लाख ६२ हजार पाँच सय रूपैयाँ र रुरुक्षेत्रमा १ करोड २१ लाख ५० हजार रूपैयाँ बजेट कटौती भएको कोष तथा लेखा नियन्त्रक बेल्वासेले जानकारी दिए।

रुरुक्षेत्र गाउँपालिकाका अध्यक्ष यदु ज्ञवालीले संघीय सरकारले बजेट कटौती गर्दा कार्यसम्पादनमा समस्या परेको बताए। धुर्कोट गाउँपालिकाका प्रमुख प्रशासकीय अधिकृत ज्ञानुराम पन्थीले बजेट कटौतीले सम्झौता गरिएका योजना समयमै भुक्तान दिन नपाएको गुनासो गरे । “बजेट आउँछ भनेर योजना सम्झौता भयो, योजना कार्यान्वयन पनि भए तर बजेट नआउने भयो”, उनले भने, “त्यस्ता योजनाहरुको भुक्तानी आगामी आर्थिक वर्षमा दिन्छौं ।”