डिपानको संस्थापन इतर समूहको द्वेध चरित्र : भित्र सहमतिमा हस्ताक्षर, बाहिर जबरजस्तीको आरोप

काठमाडौं । प्रजातन्त्रवादी प्राध्यापक संघको विवाद मिलाउन बनेको कार्यदलका दुई सदस्यको दोहोरो चरित्र देखिएको छ । विवाद मिलाउन बनेको कार्यदलमा संस्थापन इतर समूहको प्रतिनिधित्व गर्ने दुई सदस्यहरू भावुक राज न्यौपाने र यज्ञप्रसाद ज्ञवालीले बैठकमा उठेका सबै विषयमा सहमति गरेर बाहिर विवाद निम्त्याउने अभिव्यक्ति दिँदै हिँडेको भेटिएको हो ।

सात वर्षदेखि अधिवेशन नभएको संघमा अहिले पनि संस्थापन इतर समूह अधिवेशन गर्नु हुँदैन भन्ने पक्षमा जोडतोडका साथ लागिरहेको छ । अधिवेशनमा निर्वाचन हुँदा आफ्नो लज्जास्पद हार हुने देखेर उनीहरूले फर्जी मतदाता बनाएको आरोप पनि लगाएका छन् । तर संस्थापन इतर समूहकै प्रतिनिधित्व गरेर गएका न्यौपाने र ज्ञवालीले बैठकको माइन्युट पेपरमा भने सहमति गरेर हस्ताक्षर गरेको भेटिएको हो । अहिले भने सोही आधारमा बनेको मतदाता नामावलीलाई फर्जी भन्दै सो समूह निर्वाचन रोक्ने पक्षमा खुलेर लागेको छ ।

विवाद समाधानका लागि गत वर्ष नै प्रा.डा.  विनोद पराजुलीको संयोजकत्वमा बनेको कार्यदलले २०७९ साल माघ २० गते पुल्चोक क्याम्पसमा बैठक बसी विभिन्न निर्णयहरु गरेको थियो । छलफलमा उठेका सबै विषयमा सर्वसम्मत निर्णय भएको माइन्युट प्राप्त भएको छ । जसमा अहिले विवाद निम्त्याउने सदस्यहरूले पनि हस्ताक्षर गरेको भेटिएको हो । सोही प्रतिवेदनको आधारमा अहिले मतदाता नामावली तयार पारिएकोले यसमा फर्जी हुने सम्भावना नै नरहेको संघका अध्यक्ष जगत तिमिल्सिना बताउँछन् ।

पराजुलीको संयोजकत्वमा रहेको समितिमा सहप्रा.डा. तुलसीप्रसाद गौतम, उप प्रा. महेन्द्र अर्याल, उप प्रा. यज्ञप्रसाद ज्ञवाली, उपप्रा। थमनबहादुर खड्का र उपप्रा। रोशन कार्की सदस्य थिए । जसमध्ये खड्का र कार्की आमन्त्रित सदस्य हुन् ।

बैठकले अवकासप्राप्त तथा मृत्यु भएका साधारण सदस्यको नामावली मतदाता सूचीबाट हटाउने, दोहोरो नाम भएकाको दुवैतिर नाम हटाउने, इकाई अध्यक्ष र सचिवको अनिवार्य प्रतिनिधित्व, पब्लिक क्याम्पस वैध हो वा होइन भन्ने पहिचान गर्ने जस्ता निर्णयमा उनीहरुले समेत हस्ताक्षर गरेका छन् । तर अहिले उनीहरुको असन्तुष्टिका बीच यो निर्णय भएको भन्दै निर्वाचन प्रभावित पार्ने उद्देश्यले अफवाह सुरु गरिएको छ ।