सिंहदरबार संवाददाता
काठमाडौं । सांसद प्रदीप पौडेलले चालु आर्थिक वर्षमा हालसम्म लक्ष्यको ५० प्रतिशत मात्रै राजस्व उठ्नु आर्थिक अवस्थाले अर्थतन्त्र कुन अवस्थामा छ भन्ने स्पष्ट पारेको बताएका छन्। कुल १४ खर्ब ३ अर्ब रुपैयाँ राजस्व संकलनको लक्ष्य लिइएकोमा हालसम्म जम्मा ७ खर्ब ३ अर्ब रुपैयाँ मात्रै राजस्व संकलन हुनु राम्रो नभएको उनको भनाइ छ ।
प्रतिनिधिसभाको आजको बैठकको विशेष समयमा उनले यही अनुपातमा राजस्व उठ्दा चालु आवको बाँकी अवधिमा करिब दुई खर्ब राजस्व थपिने बताए ।
“यो भनेको लक्ष्यको करिब ६४ प्रतिशत मात्रै हुन्छ, यो किन र कसरी भएको छ ? किन राजस्व क्षमतामा ह्रास आएको छ ? यस विषयमा सदनमा गम्भीर समीक्षा हुनु आवश्यक छ, आजका मितिसम्म सरकारले जम्मा ९ खर्ब ७६ अर्ब खर्च गरेको छ, खर्च र आम्दानीका बीचमा तालमेल देखिएन, त्यस्तै अनुदान ५५ अर्ब प्राप्त गर्ने भनेकामा ५ अर्ब अर्थात् ८.६६ प्रतिशत पनि प्राप्त गर्न सकेका छैनौँ”, उनले भने।
वैशाख १४ गतेसम्मको चालु खर्च ७ खर्ब २७ अर्ब रुपैयाँ रहेको उल्लेख गर्दै सांसद पौडेलले चालु खर्च धान्न २४ अर्ब ऋण लिनुपर्ने अवस्था सिर्जना भएको बताए। चालु खर्च धान्नसमेत राजस्वको आर्जन पर्याप्त नहुनु अत्यन्त गम्भीर विषय भएको उनको भनाइ थियो ।
दिगो एवं फराकिलो आर्थिक वृद्धिको कुरा गर्ने मुलुकमा चालु खर्च धान्न ऋण लिनुपर्ने अवस्था सिर्जना हुने विडम्बनापूर्ण अवस्था रहेकामा सांसद पौडेलले सरकारको ध्यानाकर्षण गराए। वैशाख १४ गतेसम्म चालु खर्च लक्ष्यको ६१ दशमलव ५२ प्रतिशत र पुँजीगत खर्च लक्ष्यको ३०.४९ प्रतिशत मात्र भएको उनले सुनाए ।
प्रतिक्रिया दिनुहोस्