बजेटमा उद्योगीका सुझाव संकलन गर्दै परिसंघ

लुम्बिनी । रुपन्देही उद्योग संघ, नेपाल उद्योग परिसंघ र लुम्बिनी प्रदेश उद्योग परिसंघले आगामी वर्ष २०८०/८१ को बजेटमा सुझाव पेस गर्न उद्योगीहरुसँग छलफल गरेको छ । नेपाल उद्योग परिसंघले ७ वटै प्रदेशका उद्योगीसँग छलफल गरी सरकारका सम्बन्धित निकायमा सुझाव पेस गर्ने उद्देश्यले उद्योगीसँग छलफल थालेको हो । परिसंघले बजेटमा उद्योगीको सुझाव संकलन गर्नेक्रममा रुपन्देही उद्योग संघको आयोजनामा अन्तरक्रिया सम्पन्न गरिएको छ ।

अन्तक्रियामा सहभागी उद्योगीले हालको खराब अर्थतन्त्र सुधारका लागि राज्य चनाखो हुनुपर्नेमा जोड दिँदै नीतिगत सुधार, भौतिक पूर्वाधार विस्तार र उद्योगीले व्यहोर्नु परेका झन्झटिला प्रक्रिया, भन्सार, कर नीतिका नकारात्मक प्रभाव तथा आगामी दिनमा गर्नुपर्ने सुधारका सन्दर्भमा आ—आफ्ना राय सुझाव पेस गरेका थिए ।

कार्यक्रममा नेपाल उद्योग परिसंघ प्रतिनिधि लक्ष्मीप्रसाद सुवेदीले उद्योगीका समस्या समाधानका उचित उपाय खोज्न, आवश्यक पहल गर्न र राज्यलाई विभिन्न विषयमा सकारात्मक सुझाव दिन नेपाल उद्योग परिसंघ सक्रिय ढङ्गबाट अघि बढिरहेको बताएका थिए । उनले उद्योगीले विशेषगरी भन्सार, कर प्रणाली र नीतिगत विषयमा उठान गरेका समस्यालाई लिपिबद्ध गरी उच्चस्तरीय बैठकमा प्रस्तुत गर्ने र उद्योगीको समस्या क्रमशः समाधान गर्दै जानेसमेत प्रतिबद्धता व्यक्त गरेका थिए । कार्यक्रममा लुम्बिनी प्रदेश उद्योग परिसंघका अध्यक्ष एजाज आलम संघका पूर्व अध्यक्ष बोनिन पिया, प्रथम उपाध्यक्ष, कृष्णप्रसाद पराजुली, उद्योगी रामप्रसाद बस्याल लगायतले विषयवस्तु उठान गरेका थिए ।