सुदूरपश्चिममा ‘बुस्टर डोज’ खोप लगाउनेको संख्या न्यून

बैतडी । सुदूरपश्चिम प्रदेशमा कोरोनाविरुद्धको बुस्टर डोज लगाउने संख्या न्यून रहेको छ । प्रदेशमा कोरोनाविरुद्धको खोपको पूर्ण मात्रा लगाउनेभन्दा बुस्टर डोज लगाउनेको संख्या आधा कम हो ।

प्रदेशका ९ वटै जिल्लामा गरी हालसम्म कूल २२ लाख ३३ हजार ८ सय ३१ जनाले कोरोनाविरुद्धको खोपको पूर्ण मात्रा लगाएका छन् । तेस्रो तथा बुस्टर डोजको पहिलो मात्रा लगाउने सङ्ख्या १० लाख १५ हजार ३७ रहेको सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले जानकारी दिए ।

कैलालीमा ७ लाख ३२ हजार सात सय ८९ जनाले पूर्ण मात्रा लगाएकामा ३ लाख ८६ हजार एक सय ८८ जनाले मात्रै बुस्टर डोज लगाएका छन् । कञ्चनपुरमा ४ लाख ३९ हजार एक सय ६८ जनाले पूर्ण र १ लाख ९९ हजार आठ सय ५७ जनाले बुस्टर डोज लगाएको निर्देशनालयले जनाएका छन् ।

यस्तै बैतडीमा २ लाख ११ हजार छ सय ५२ जनाले पूर्ण तथा ९८ हजार दुई सय १३ बुस्टर डोज, अछाममा १ लाख ८३ हजार ६ सय २ जनाले पूर्ण तथा ८८ हजार ८ सय ५२ जनाले बुस्टर डोज, डोटीमा १ लाख ६१ हजार १ सय ३८ जनाले पूर्ण तथा ६३ हजार ५ सय १४ जनाले बुस्टर डोज, बझाङमा १ लाख ३७ हजार ६ सय ११ पूर्ण तथा ३२ हजार १ सय १७ जनाले बुस्टर डोज, डडेल्धुरामा १ लाख २७ हजार ७ सय २५ जनाले पूर्ण तथा ६७ हजार ५ सय ८४ बुस्टर डोज, बाजुरामा १ लाख २५ हजार ४ सय ६८ जनाले पूर्ण तथा २९ हजार ८ सय ९ जनाले बुस्टर डोज तथा दार्चुलामा १ लाख १४ हजार ६ सय २८ जनाले पूर्ण तथा ४८ हजार ९ सय ३ जनाले बुस्टर डोज लगाएका छन् ।

प्रदेशभरि कोरोना भाइरसविरुद्धको चौथो तथा बुस्टर डोजको दोस्रो मात्रा लगाउनेको सङ्ख्या भने २९ हजार आठ सय ५६ मात्रै रहेको निर्देशनालयको तथ्याङ्कमा उल्लेख छ । रोग फैलिएपछि मात्रै खोप लगाउनुपर्छ भन्ने सोचका कारण बुस्टर डोज लगाउनेको संख्या न्यून भएको सुदूरपश्चिम प्रदेश स्वास्थ्य निर्देशनालयका जनस्वास्थ्य निरीक्षक मीनराज जोशीले बताए। उनले भने, “रोग फैलिएपछि मात्रै खोप लगाउनुपर्छ भन्ने सोच अझै छ ।”

प्रदेशमा खोप कम मात्रामा आएकाले यो समस्या देखिएको जोशीको भनाइ छ । उनले भने, “खोप बढी मात्रामा आयो भने सबैलाई लगाउँछौँ ।” प्रदेशमा हाल कोरोनाविरुद्धको खोप लगाउने अभियान जारी छ । पचपन्न वर्षमाथिका, दीर्घरोगी, स्वास्थ्यकर्मी, कर्मचारीलगायतलाई बुस्टर डोज दिन थालिएको छ । उनीहरुका लागि ८९ हजार डोज खोज उपलब्ध रहेको जोशी बताउँछन्।

सुदूरपश्चिममा २०७७ माघ १४ गतेदेखि कोरोना भाइरसविरुद्धको खोपको अभियान सुरु गरिएको थियो । भारतसँग सीमा जोडिएको यस प्रदेशमा दैनिक कोरोना संक्रमण बढ्दै गएको छ । संक्रमण अधिकांश भारतबाट फर्किएकामा रहेकाले जोखिम बढेको छ । सीमानाकामा हेल्थ डेस्क स्थापनाका साथै अनिवार्य कोरोना परीक्षण गराउने गरिएको स्वास्थ्य कार्यालय बैतडीका प्रमुख योगेशप्रसाद भट्टले बताए । प्रदेशसमा हालसम्म ६ लाख ४७ हजार ७ सय ३४ जनाको कोरोना परीक्षण गरिएको छ । हालसम्म ६१ हजार ९ सय ७७ जनामा कोरोना सङ्क्रमण पुष्टि भएको छ । कोरोनाबाट प्रदेशमा हालसम्म ६ सय ३५ जनाको ज्यान गइसकेको छ ।