कृषि विकास बैंकमा नयाँ सिईओः इच्छाराज तामाङदेखि डा. युवराज खतिवडासम्मलाई चासो

काठमाडौं । बहुमत सरकारी सेयर स्वामित्व रहेको कृषि विकास बैंकमा नयाँ सिईओ चयन प्रक्रिया जारी छ । छनौट समितिले आव्हान गरेको समय अर्थात माघ १५ गतेभित्र २२ जनाले आवेदन दिएका थिए । उनीहरुले पेश गरेको प्रस्ताव र कागजातहरुको मूल्यांकन गरि पाँच जनाको नाम छनौट गरि अन्तरवार्ताका लागि बोलाइनेछ । कृषि विकास बैंकमा अनिल उपाध्यायको कार्यकाल नथपिएपछि नयाँ सिईओका लागि प्रक्रिया अघि बढेको हो ।

तर अहिले नै कृषि विकास बैंकको सिईओ को हुनेछ भनेर अड्कलहरु सुरु भैसकेका छन् । त्यसमा व्यवसायीक घरानादेखि पूर्व गभर्नर तथा अर्थमन्त्री र राजनीतिक वृत्तमा पनि व्यापक चासो छ ।

बैंकको नयाँ सिईओमा एमाले अध्यक्ष केपी ओली, प्रधानमन्त्री पुष्पकमल दाहाल, अर्थमन्त्री बिष्णु प्रसाद पौडेलको मात्रै होइन, पूर्व अर्थमन्त्री डा. युवराज खतिवडादेखि विवादास्पद व्यवसायी इच्छाराज तामाङको समेत चासो देखिएको छ ।

डा. खतिवडाले नेपाल राष्ट्र बैंकका पूर्व कर्मचारी अशोक पौडेललाई सिईओ बनाउन चाहेका छन् । पौडेलका लागि डा. खतिवडाले एमाले अध्यक्ष केपी ओलीलाई कन्भिन्स गराउन प्रयास गरिरहेको स्रोत बताउँछ ।

उता, सिभिल बैंकका पूर्व सिईओ गोबिन्द गुरुङलाई कृषि विकास बैंकको सिईओ बनाउन विवादास्पद व्यवसायी इच्छाराज तामाङको समुह लागिपरेको बताइन्छ । तामाङले पनि एमाले अध्यक्ष केपी ओलीसँग लबिङ थालेका छन् । सिभिल बैंकलाई राम्रोसँग चलाउन नसकेको र इच्छाराज तामाङको ‘एस म्यान’का रुपमा काम गरेकाले उनलाई कृषि विकास बैंकको सिईओ बनाउँदा गलत सन्देश जाने भन्दै एमालेकै अर्काे एक समुह गुरुङलाई रोक्न लागिपरेको छ । उता, एमाले उप महासचिव पृथ्वी सुब्बा गुरुङले पनि गोबिन्दलाई सिईओ बनाउन अर्थमन्त्री पौडेललाई आग्रह गरिसकेको स्रोत बताउँछ ।

निमित्त सिईओको जिम्मेवारीमा रहेका प्रताव सुवेदी पनि  सिईओ बनाउने लाइन खाेजिरहेका छन् । इलामका पूर्ण प्रसाद आचार्य भने सुभाष नेम्बाङ मार्फत लाइन मिलाउने प्रयासमा छन् । हाल सिडीएससीका सिईओ रहेका उनलाई त्यहाँ डा. युवराज खतिवडा अर्थमन्त्री हुँदा नियुक्ती गरिएको थियो । उता, राष्ट्रिय सहकारी बैंकका सिईओ बद्रि गुरागाईँले एमाले नेता भानु ढकाल र बिनोद ढकाललाई अघि सारेर सिईओ बन्ने अभियान थालेका छन् । गुरागाईँले केशब बडाललाई पनि सहयोग गरिदिन आग्रह गरेको स्रोत बताउँछ । उता, कृषि विकास बैंककै डिजिएम रहेका यज्ञ न्यौपानेले एमाले महासचिव शंकर पोखरेलबाट आश गरेको देखिन्छ ।

त्यस बाहेक राष्ट्रिय बाणिज्य बैंकका सिईओ किरण श्रेष्ठले आफ्नै मातहतमा काम गरेका पूर्व डेपुटी सिईओ कबिराज अधिकारीलाई अघि सारेको स्रोत बताउँछ ।

टप फाइभको लिगलिगे दौड
अहिले सिईओका लागि आवेदन दिएकाहरु टम फाइभको सूचिमा पर्नका लागि दौडधुप गरिरहेका छन् । आ आफ्नो नजिकको शक्ति केन्द्र मार्फत टप फाइभमा परेर सिईओ बन्ने बाटोमा एक कदम अघि बढ्न सबै प्रतिष्पर्धीहरुले कडा मेहनत गरेका हुन् ।

२२ आवेदकमध्ये गोबिन्द गुरुङ, पूर्ण आचार्य, प्रताव सुवेदी, अशोक पौडेल, बद्रि गुरागाईँ, कबिराज अधिकारी र यज्ञ न्यौपानेमध्येबाटै टप फाइभको सूचि तयार रहने सम्भावना रहेको स्रोत बताउँछ । आफु भन्दा कमजोर प्रतिष्पर्धीलाई टप फाइभमै छिर्न नदिएर आफ्नो लागि बाटो सहज बनाउने अभियानमा उनीहरु लागिपरेका छन् । छनौट समितिले भने केहि दिनभित्र टप फाइभको सूचि तयार पार्दैछ ।