सिंहदरबार संवाददाता
काठमाडौं । नेपाल स्टक एक्सचेञ्ज (नेप्से) मा साताको अन्तिम कारोबारको दिन बिहिबार दोहोरो अंकले घटेर बन्द भएको छ । बुधबार ४.९७ अंकले बढेको नेप्से बिहिबार फेरी घटेको हो ।
बिहिबार नेप्से परिसूचक २२.१२ अंक घटेर २,०९४.५४ को विन्दुमा बन्द भएको छ । त्यस्तै, ठुला कम्पनीको सेयर मापक सेन्सेटिभ इण्डेक्स पनि २.८० अंक घटेर ३९८.३७ को विन्दुमा झरेको छ ।
बिहिबार नेप्से परिसूचक घटेपनि कारोबार रकममा भने सामान्य सुधार देखिएको छ । बिहिबार दिनभरीमा २५७ कम्पनीको ५८ लाख ९८ हजार ९०३ कित्ता सेयर २ अर्ब ९ करोड ६४ लाख रुपैयाँमा खरिदबिक्री भए । अघिल्लो दिन अर्थात बुधबार १ अर्ब ७६ करोड ७० लाख बराबरको कारोबार भएको थियो ।
कारोबार भएका कम्पनीमध्ये १९ वटा कम्पनीको सेयर मूल्य बढेको छ । १९४ वटा कम्पनीको सेयर मूल्य घटेको छ । भने, ३ वटा कम्पनीको सेयर मूल्य स्थिर रहेको छ ।
नेप्सेका अनुसार आदर्श लघुवित्त वित्तीय संस्थाको सेयर पोजेटिभ सर्किट लेभलमा कारोबार भएको छ । लघुवित्तको सेयर मूल्य १० प्रतिशतले बढेर प्रतिकित्ता एक हजार ९ सय २८ दशमलव ९० रुपैयाँ पुगेको छ । सपोर्ट माईक्रोफाइनान्स वित्तीय संस्थाको सेयर मूल्य सबैभन्दा बढी ५.८० प्रतिशतले घटेको ।
कारोबारको आधारमा बिहिबार सबैभन्दा बढी स्ट्याण्डर्ड चार्टर्ड बैंकको भएको छ । बैंकको १० करोड १३ लाखभन्दा बढीको कारोबार भएको छ ।
त्यसैगरी, एनआइसी एशीया बैंकको ५ करोड ५० लाख र आइएमई जनरल इन्स्यारेन्सको ४ करोड ९० लाख रुपैयाँ भन्दा बढी कारोबार भएको छ ।
प्रतिक्रिया दिनुहोस्