सिंहदरबार संवाददाता
सर्लाही । गोलभेँडाको उचित मूल्य नपाएपछि लालबन्दीका किसान मर्कामा परेका छन् ।
भारतबाट गोलभेँडा बजारमा भित्रिन थालेपछि जिल्लामा उत्पादित गोलभेँडाले मूल्य पाउँन नसक्दा उनीहरु मर्कामा परेका हुन् । हाल किसानहरुले गोलभेँडा प्रतिक्रेट १ सय ५० देखि २ सय रुपैयाँ सम्ममा बिक्री गरिरहेका छन् ।
प्रतिकेजी ६ देखि ८ रुपैयाँमा बेच्नुपर्दा लागत उठाउन मुस्किल भएको हरिवन नगरपालिका-२, आँमटोलका किसान रामपुकार महतोले गुनासो गरे । “सुरुमा एक क्रेटको १ हजार २ सय रुपैयाँसम्म हुन्थ्यो तर अहिले १ सय ५० रुपैयाँमा बेच्नु परेको छ”, उनले भने। भारतबाट गोलभेँडा भित्रिदा लालबन्दीका किसान मारमा परेका उनको भनाइ थियो ।
लालबन्दी नगरपालिका-१०, तुलसी टोलका किसान प्रेम श्रेष्ठले क्रेटको डेढ सय रुपैयाँका दरले बेच्नु पर्दा लागत उठाउन नै समस्या भइरहेको बताए। उनका अनुसार काठमाडौंका व्यापारीले पनि किसानबाट सस्तोमा गोलभेँडा किन्ने गरेका छन् ।
लालबन्दी नगरपालिका-१ नवलपुरका किसान रामचरित्र कुशवाहले १० कठ्ठामा गोलभेँडा खेती गरेका छन् । “बजारमा व्यापारीले भारतीय गोलभेँडा सस्तोमा आइरहेको छ भन्दै हाम्रो गोलभेँडा लिन मानिरहेका छैनन्”, उनले भने।
खेतमा पाकेका गोलभेँडा तत्काल बिक्री नगरे नष्ट भएर जाने भएकाले किसान व्यापारीले भनेकै मूल्यमा बिक्री गर्न बाध्य छन् । पछिल्लो समय बिचौलिया सक्रिय हुँदा किसान मारमा परेका कृषि थोक बजार व्यवस्थापन समिति लालबन्दीका बजार व्यवस्थापक शम्भुप्रसाद घिमिरेले बताए ।
बजारमा अहिले भारतीय गोलभेँडा धेरै भित्रिएको छ, जिल्लामा पनि धेरै नै उत्पादन हुँदा किसानले उचित मूल्य पाउन नसकेका कृषि थोक तरकारी बजार व्यवस्थापन समितिका अध्यक्षसमेत रहेका व्यापारी तोरनबहादुर मगरले बताए ।
जिल्लाको लालबन्दी, रानीगन्ज, पत्थरकोट, चन्द्रपुर, हीरापुर, नवलपुर, अत्रौली, सासापुरलगायतका क्षेत्रमा गोलभेँडाको व्यावसायिक खेती गरिन्छ ।
लालबन्दी बजारबाट अहिले दैनिक २५ देखि ३० टन गोलभेँडा काठमाडौंको कालीमाटीलगायत देशका प्रमुख बजारमा निर्यात भइरहेको कृषि थोक बजार व्यवस्थापन समिति लालबन्दीले जनाएको छ ।
कृषि ज्ञान केन्द्र सर्लाहीका प्रमुख कमलदेवप्रसाद कुशवाहले कृषि बजार निर्देशनालय, नगरपालिका, व्यापारी र किसानले संयुक्त रुपमा बजार भाउ तोक्नुपर्ने बताउँछन् । स्थानीय सरकारले बेवास्था गर्दा आफूहरु मर्कामा परेको किसानहरुको गुनासो छ ।
प्रतिक्रिया दिनुहोस्