सिंहदरबार संवाददाता
काठमाडौं । रिडी पावर कम्पनीले ५० प्रतिशत हकप्रद सेयर निष्काशन तथा बिक्री गर्ने भएको छ । कम्पनीको बुधबार बिहान बसेको सञ्चालक समिति बैठकले ४० प्रतिशत बोनस सेयर वितरणपछि कायम हुने चुक्ता पुँजीको ५० प्रतिशत अर्थात १ः०.५० अनुपातमा हकप्रद सेयर जारी गर्ने निर्णय गरेको हो ।
सञ्चालक समितिको प्रस्ताव विद्युत नियमन आयोगमा अनुमतिका लागि पेश गरिने कम्पनीले जानकारी गराएको छ । आयोगले स्वीकृति दिएमा उक्त हकप्रद प्रस्ताव आगामी वार्षिक साधारण सभामा पेश हुनेछ ।
कम्पनीको बुधबार बिहान बसेको सञ्चालक समिति बैठकले वार्षिक साधारण सभा माघ २९ गते आइतबार बस्ने निर्णय गरेको छ ।
सो प्रस्ताव सभाबाट अनुमोदन भएपछि नेपाल धितोपत्र बोर्डमा अन्तिम स्वीकृतिका लागि पेश गरिने छ । बोर्डबाट उक्त हकप्रद सेयर जारी गर्ने स्वीकृती प्राप्त भएपश्चात कम्पनीले अंकित मूल्य १०० रुपैयाँका दरले ४० प्रतिशत अर्थात ७७ लाख ४४ हजार ५०६ कित्ता हकप्रद सेयर निष्काशन गर्नेछ ।
कम्पनीले २० मेगावाट क्षमताको तल्लो बलेफिखोला जलविद्युत आयोजना निर्माणका लागि स्वःपुँजी व्यवस्थापन गर्न बोनस सेयरपछि हकप्रद सेयर बिक्री गर्न लागेको हो ।
कम्पनीले आगामी वार्षिक साधारण सभाका लागि माघ १८ बुक क्लोज गर्ने निर्णय पनि गरेको छ । सोहि अनुसार माघ १७ गतेसम्म नेप्सेमा कारोबार भई कायम रहने सेयरधनीले मात्र सभामा भाग लिन र प्रस्तावित बोनस सेयर प्राप्त गर्न सक्नेछन् ।
प्रतिक्रिया दिनुहोस्