सिंहदरबार संवाददाता
भक्तपुर । विगत पाँच वर्षमा चाँगुनारायण नगरपालिकाको बेरुजु झण्डै ७ करोड रुपैयाँ पुगेको छ । नगरपालिकाका प्रमुख जीवन खत्रीले विकास बजेटमा रहेको बेरुजु घटाउन आह्वान गरेका छन् ।
नगरपालिकाको बेरुजु आर्थिक वर्ष २०७४/७५ देखि आव २०७७/७८ सम्ममा ३३ शीर्षकमा ६ करोड ८६ लाख ४२ हजार ८ सय ७३ रहेको छ । त्यसमा सबैभन्दा बढी बेरुजु आव २०७७/७८ मा उपभोक्ता समितिमार्फत गरिएको कामको रहेको छ ।
उपभोक्ता समितिले नगरपालिकासँग सम्झौता गरेर रकम निकास गर्ने तर उपभोक्ता समिति आफूले काम नगरेर अर्को ठेकेदारलाई कामको जिम्मा दिएका विकासका कामको मात्रै १ करोड २८ लाख ८९ हजार ८ सय ६४ को बेरुजु रहेको नगरपालिकाको आर्थिक प्रतिवेदनमा उल्लेख छ ।
नगर प्रमुख खत्रीले भने, “विगत पाँच वर्षमा हचुवामा जसरी पायो त्यसरी रकम बाँडेको देखियो, लगेको रकमको काम गरेर फछर्यौट गरेको भए हुन्थ्यो, काम अधूरो बनाउने र कामै नगरेको पाइएकाले त्यस्तो रकम इमान्दारिताका साथ फिर्ता गर्न आह्वान गर्दछु, अन्यथा कानुनअनुसार अगाडि बढ्छौँ ।”
त्यस्तै नगरपालिकाले चालु आव २०७९/८० का लागि पुँजीगततर्फ १ अर्ब ३४ करोड ७१ लाख ४३ हजार ९ सय ५७ र चालुतर्फ ७७ करोड १८ लाख ८२ हजार दुई सय ४३ रुपैयाँ गरी कूल २ अर्ब ११ करोड ८९ लाख ८६ हजार २ सय रुपैयाँ बजेट विनियोजन गरेकामा यो ६ महिनाको अवधिमा कुल बजेटको २३.२८ प्रतिशत अर्थात् पुससम्ममा कूल ४९ करोड ३४ लाख ७० हजार रुपैयाँ खर्च गरेको नगर प्रमुख खत्रीले बताए ।
आन्तरिक राजस्वतर्फ २६ करोड २६ लाख ३० हजार रुपैयाँ सङ्कलन गर्ने लक्ष्य राखेकामा यहीँ पुससम्ममा ६ करोड ८४ लाख १३ हजार दुई सय ४३ अर्थात् २६.४ प्रतिशत मात्रै सङ्कलन भएको उनले जानकारी दिए ।
प्रतिक्रिया दिनुहोस्