सिंहदरबार संवाददाता
काठमाडौं । नेपाल धितोपत्र बोर्डले केयर रेटिङ नेपालको लाइसेन्स निलम्बन गर्ने भएको छ । आफ्नो माउ कम्पनी विशाल ग्रुप सम्बद्ध बिभिन्न कम्पनीहरुको रेटिङ गरेपछि बोर्डले केयर रेटिङको लाइसेन्स निलम्बन गर्न लागेको हो ।
केयर रेटिङ नेपालले विशाल ग्रुपकै मुख्य लगानी रहेको एनआईसी एशिया बैंकको डिबेञ्चरको रेटिङ गरेको थियो । त्यस बाहेक बिभिन्न बैंकहरुबाट ऋण लिएका विशाल ग्रुप सम्वद्ध आधा दर्जन कम्पनीहरुको ऋणको रेटिङ गरेको थियो ।
केयरले विशाल ग्रुप सम्बद्ध युनाइटेड डिष्ट्रिब्युटर्स प्राली, एशियन डिष्ट्रिब्युटर्स प्राली, भीजी अटोमोबाइल्स प्राली, घोराही सिमेन्ट लिमिटेड, मैनावति स्टिल प्राली, ग्लोबल ट्रेडिङ कन्सर्न प्राली लगायतका कम्पनीहरुको रेटिङ गरेको थियो ।
क्रेडिट रेटिङ नियमावली २०६८को उल्लंघन गरि आफ्नै सेयरधनीको क्रेडिट रेटिङ गरेपछि केयरको लाइसेन्स संकटमा पर्ने भएको हो । नेपाल धितोपत्र बोर्डले केयरलाई रेटिङ किन रद्ध नगर्ने तथा केयर रेटिङ नेपाल लिमिटेडको अनुमति पत्र किन निलम्बन नगर्ने भनि पत्राचार गरिसकेको छ ।
स्वार्थ बाझिने गरी रेटिङ कम्पनीकै सेयरधनी रहेका कम्पनीहरुको नै रेटिङ गरेपछि नेपाल धितोपत्र बोर्डले केयर रेटिङ्स नेपाललाई कारबाहीमा गर्न प्रक्रिया अघि बढाएको हो ।
पुस २४ गते केयर रेटिङलाई पत्र पठाउँदै बोर्डले लाइसेन्स किन रद्ध नगर्ने भनेको हो । कम्पनीलाई धितोपत्र सम्बन्धी ऐन २०६३, को दफा १०१ (७) अनुसार हदैसम्मको कारवाही किन नगर्ने ? भनी सफाइ पेश गर्न पत्रमा भनेको छ ।
केयर रेटिङ नेपालमा केयर रेटिङ इण्डिया, विशाल ग्रुप, इमर्जिङ नेपाल, नेपाल रिईन्स्योरेन्स कम्पनी, ग्लोबल आइएमई बैंक, प्रुडेन्सियल इन्स्योरेन्स र एलआईसी नेपालको मुख्य लगानी रहेको छ ।
प्रतिक्रिया दिनुहोस्