सिंहदरबार संवाददाता
दिपायल । आलु खेतीबाट डोटीका किसानले मनग्य आम्दानी गरेका छन् । विगतमा परम्परागतरुपमा तरकारी खेती गर्दैआएका किसान पछिल्लो समयमा आधुनिकरुपमा आलु खेतीतर्फ आकर्षित भएका हुन् । अधिकांश खेतीयोग्य जग्गामा आलुखेती हुन थालेपछि डोटी जिल्ला आलु खेतीतर्फ आत्मनिर्भर बन्दै गएको छ ।
परम्परागत खेतीको तुलनामा आधुनिक खेतीबाट पर्याप्त आम्दानी गर्न सकिने भएका कारण किसान व्यावसायिकरुपमा आलुखेती गर्न थालेका हुन् । जिल्लाको बडिकेदार गाउँपालिका–५ थानकोटका किसान दिल्ली मल्लले आलु खेतीबाट निकै आम्दानी गरेका छन् । उनी हिउँदे र बर्खे गरी दुवै याममा २ लाख रुपैयाँ बराबरको आम्दानी गर्दै आएको बताउँछन् । धान,गहुँ र तोरी खेतीले खासै आम्दानी हुँदैनथ्यो,’मल्ल भन्छन्, आलु खेती गर्न थालेपछि यहाँका किसानले निकै आम्दानी गरेका छन्।”
जिल्लाको जोरायल गाउँपालिका–६ दहका किसन गोपाल साउदले ४० रोपनी जमिनमा लगाएका आलु खनिसकेका छन् । काडिन्ल नामको रातो आलु ६० क्विन्टल फलेको र उक्त आलु प्रतिकिलो ४० रुपैयाँमा बिक्री भइरहेको उनको भनाइ छ । एकै याममा कारिब २ लाख ४० हजार बराबर आम्दानी भएको साउद उल्लेख गर्छन् ।
कृषि ज्ञान केन्द्रबाट चक्लाबन्दी आलु खेतीका लागी ५० प्रतिशत अनुदान तथा प्राविधिक सहयोगमा आलुको बीउ ल्याएर लागइएकामा पानी नपरेकाले खासै उत्पादन नभएको उनी गुनासो गर्छन् ।
आलु उत्पादनलाई उपभोक्तामुखी बनाउँदै किसानले सहज बनाउँदै लगेको बडीकेदार गाउँपालिकाका कृषि शाखा प्रमुख सुरेन्द्र शाहा बताउँछन् । हिउँदे र बर्खे बालीका रुपमा आलुखेती गरी उक्त गाउँपालिकाका प्रत्येक किसानले ५ लाख रुपैयाँभन्दा बढी आम्दानी गरेका छन् ।
जिल्लामा पछिल्लो समय आलु खेती गर्ने किसान निकै बढेकाले किसानलाई समयमै बीउ बीजन, मल, कृषि औजारलगायत समस्या भएकाले स्थानीय तह, संघ र प्रदेश सरकारसँग समन्वय गरी उपलब्ध गराउन पहल गरीने प्रमुख पनेरु बताउँछन् ।
गत आर्थिक वर्ष २०७७/७८ मा २ हजार ९ सय ५ हेक्टर जमिनमा लगाएको आलु ३३ हजार ६ सय ६६ मेट्रिटन उत्पादन भएको थियो भने यस बर्ष ३ हजार ४ सय ३३ हेक्टर जमिनमा लगाएको आलु ४० हजार ५५८ मेट्रिकटन उत्पादन भएको उक्त केन्द्रको तथ्याङ्कमा उल्लेख छ ।
जिल्लाको सायल गाउँपालिका, पूर्वचौकी गाउँपालिका, दिपायल सिलगढी नगरपालिका र जोरायल गाउँपालिकालाई आलु पकेटको रुपमा छनोटगरी आलु खेती गरिँदै आएको उक्त केन्द्रले जनाएको छ ।
प्रतिक्रिया दिनुहोस्