अलपत्र अवस्थामा तरकारी सङ्कलन केन्द्र

चौतारा। सिन्धुपाल्चोकको इन्द्रावती गाउँपालिका वडा नं १२ मा रहेको तरकारी सङ्कलन केन्द्र निर्माण भएको सात वर्ष बितिसक्दा पनि प्रयोगमा आउन सकेको छैन ।

युएसएआइडीको सहयोग र टुकी सङ्घ सुनकोसीको सहकार्यमा सञ्चालन भएको सबल कार्यक्रम र सप्रोस नेपालको ३२ लाखको संयुक्त लगानीमा बनेको तरकारी तथा चिस्यान केन्द्र प्रयोगविहीन बनेको छ । तरकारी उत्पादन गर्ने किसानले फलाएको उत्पादनलाई सङ्कलन गर्ने र बजारसम्म पुर्याउने, बेमौसमी तरकारी तथा फलफूललाई चिस्यान केन्द्रमा सुरक्षित राख्ने उद्देश्य राखिएको थियो तर यो उद्देश्यअनुसार कुनै पनि काम अघि बढ्न नसकेको स्थानीय कृषक प्रमोद दनुवारले बताए ।

यस्तै जुगल गाउँपालिकाको पाङ्ताङमा रहेको जुगल कृषि सङ्कलन केन्द्र पनि प्रयोगविहीन बनेको छ । गाउँपालिकाको ५ लाख र युएनडिपीको १ लाख २० हजार रुपैयाँ गरी ६ लाख २० हजार रूपैयाँ लागतमा निर्माण भएको सङ्कलन केन्द्र प्रयोगमा नआउँदा कृषकले उत्पादन गरेका तरकारी बारीबाटै बिक्री गर्नुपर्ने बाध्यता रहेको स्थानीय जेपी सिलवालले बताए ।

विसं २०७७ मा निर्माण गरिएको कृषि भवन प्रयोगमा आउन नसक्दा झाडीमा परिणत भएको कृषक सुशान्त लामिछानेले बताए । सरकारी तथा गैरसरकारी संस्थाले उपलब्ध गराउने अनुदानको रकमका लागिमात्रै ध्यानमा राखेर निर्माण गरिएको यी तरकारी सङ्कलन केन्द्र एउटा उदाहरण बनेको छ ।

जिल्लाको नवलपुर र ज्यामिरेमा निर्माण गरिएको सङ्कलन केन्द्र पनि प्रयोगमा आउन सकेका छैनन् । जिल्लामा तरकारी सङ्कलन केन्द्र नहुँदा उत्पादन गरेको तरकारीले उचित बजार नपाएको कृषकको गुनासो छ । कृषकले उत्पादन गरेको तरकारी डोकामा बोकेर डुलाउँदै बिक्री गर्नुपर्ने बाध्यता रहेको छ तर निर्माण भएको तरकारी सङ्कलन केन्द्रसमेत प्रयोगमा नआउँदा सास्ती खेप्नुपरेको ज्यामिरेका बालमुकुन्द अधिकारीले गुनासो गरे ।