सिंहदरबार संवाददाता
काठमाडौं । सञ्चालनमा रहेका २६ वाणिज्य बैंकमध्ये हालसम्म १६ वटाले गत आर्थिक वर्षको अपरिस्कृत वित्तीय विवरण सार्वजनिक गरेका छन् । यी बैंकहरुले गत आवको असार मसान्तसम्म कुल ४४ अर्ब ३५ करोड रुपैयाँ बढी खुद नाफा आर्जन गरेका छन् । जुन अघिल्लो आवको सोही अवधिको तुलनामा २६.१६ प्रतिशतले बढी हो । अघिल्लो आवमा यी १६ वाणिज्य बैंकहरुले कुल ३५ अर्ब १५ करोड रुपैयाँ खुद नाफा कमाएका थिए ।
गत आवको वित्तीय विवरण प्रकाशित गर्ने वाणिज्य बैंकहरुमा एभरेष्ट, एनआइसी एशिया, ग्लोबल आइएमई, सनराइज, सानिमा, प्रभु, सिटिजन्स, लक्ष्मी, एनसीसी, स्टयाण्डर्ड चार्टर्ड, माछापुच्छ्रे, प्राईम, कुमारी, हिमालयन र नेपाल एसबिआई बैंक हुन् ।
खुद नाफाको ग्रोथमा स्टयाण्डर्ड चार्टर्डको ग्रोथ अब्बल
गत आवको वित्तीय विवरण प्रकाशित गर्ने बैंकहरुको नाफाको ग्रोथलाई प्रतिशतमा हेर्दा अघिल्लो आवको खुद नाफामा नेपाल एसबिआइ बैंकले सबैभन्दा बढी वृद्धि गरेको छ । बैंकले अघिल्लो आवमा आर्जित खुद नाफामा ७०.०४ प्रतिशतले वद्धि गर्दै गत आवमा १ अर्ब ६३ करोड रुपैयाँ कमाएको हो ।
यस्तै, नाफाको ग्रोथको दोस्रो नम्बरमा स्ट्याण्डर्ड चार्डर्ट बैैक रहेको छ । बैंकले अघिल्लो आवमा आर्जित खुद नाफामा ६२.२७ प्रतिशतले वृद्धि गरी गत आवमा २ अर्ब २२ करोड रुपैयाँ कमाएको हो । नाफाको ग्रोथको तेस्रो नम्बरमा भने एनसीसी बैंक रहेको छ । बैंकले अघिल्लो आवमा आर्जित खुद नाफामा ५१.९८ प्रतिशतले वृद्धि गरी गत आवमा २ अर्ब २ करोड रुपैयाँ खुद नाफा कमाएको हो ।
यस्तै, गत आवमा सबैभन्दा बढी खुद नाफा कमाउनेमा भने ग्लोबल आइएमई बैंक रहेको छ । बैंकले गत आवमा ५ अर्ब २० करोड रुपैयाँ खुद नाफा कमाएको छ । जुन अघिल्लो आवको भन्दा २५ प्रतिशत बढी हो । अघिल्लो आवमा बैंकले ४ अर्ब १६ करोड रुपैयाँ खुद नाफा कमाएको थियो ।
यस्तै, प्रभु बैंकले अघिल्लो आवको खुद नाफामा प्रभु बैंकले ५१.११ प्रतिशतले वृद्धि गरी २ अर्ब ६० करो्ड रुपैयाँ पुर्याएको छ । भने, सनराइज बैंकले अघिल्लो आवमा आर्जित खुद नाफा गत आवमा ४८. ६९ प्रतिशतले वृद्धि गरी २ अर्ब १५ करोड रुपैयाँ पुर्याएको छ ।
साथै, अघिल्लो आवमा आर्जित खुद नाफामा कुमारी बैंकले ४३.८७ प्रतिशत, एभरेष्ट बैंकले ४३.७७ प्रतिशत, एनआइसी एशिया बैंकले ३८.८६ प्रतिशत, माछापुच्छ्रे बैंकले ३४.४३ प्रतिशत, सिटिजन्स बैंकले २४.७६ प्रतिशत, इन्भेष्मेण्ट बैंकले १४.८३ प्रतिशत र लक्ष्मी बैंकले १.७६ प्रतिशतले वृद्धि गरेका छन् ।
अघिल्लो आवको तुलनामा गत आवमा सानिमा बैंक र हिमालयन बैंकको खुद नाफा भने घटेको छ । अघिल्लो आवमा सानिमा बैंकले २ अर्ब ३१ करोड रुपैयाँ खुद नाफा कमाएको थियो । जसमा १.०७ प्रतिशतले घटेर गत आवमा बैंकको खुद नाफा २ अर्ब २९ करोड रुपैयाँमा सिमित भएको छ । साथै, हिमालयन बैंकले अघिल्लो आवमा २ अर्ब ९९ करोड रुपैयाँ खुद नाफा आर्जन गरेकोे थियो । गत आवमा यस्तो नाफा १७.२२ प्रतिशतले घटेर २ अर्ब ४८ करोड रुपैयाँमा सिमित भएको छ ।
सेयरधनीलाई लाभांश वितरण क्षमतामा एभरेष्ट बैंक अब्बल
गत आवको वित्तीय विवरण सार्वजनिक गर्ने १६ वाणिज्यले कुल २९ अर्ब ८२ करोड रुपैयाँ वितरण योग्य नाफा आर्जन गरेका छन् । अघिल्लो आवमा यी बैंकहरुको यस्तो नाफा कुल २४ अर्ब ६८ करोड रुपैयाँ थियो ।
गत आवको वित्तीय विवरण सार्वजनिक गर्ने १६ बैंैकहरुको मौज्दात चुक्तापुँजी र आर्जित वितरण योग्य नाफालाई गणना गर्दा गत आवको नाफाबाट सेयरधनीलाई २.५३ प्रतिशतदेखि ४१.१५ प्रतिशतसम्म लाभांश वितरण गर्न सक्ने सम्भावना छ । जसमा सबैभन्दा बढी सेयरधनीलाई लाभांश वितरण गर्ने क्षमता एभरेष्ट बैंकको रहेको छ । भने दोस्रोमा हिमालयन र तेस्रोमा एनआइसी एशिया बैंकको लाभांश क्षमता बढी रहेको छ ।
९ अर्ब ४६ करोड रुपैयाँ चुक्ता पुँजी भएको एभरेष्ट बैंकले गत आवको असार मसान्तसम्म ३ अर्ब ८९ करोड वितरण योग्य नाफा कमाएको छ । जसबाट बैंकले सेयरधनीलाई ४१.१५ प्रतिशत लाभांश वितरण गर्न सक्ने देखिन्छ ।
यस्तै, हिमालयन बैंकको चुक्ता पुँजी १२ अर्ब ९६ करोड र वितरण योग्य नाफा २ अर्ब ६६ करोड रुपैयाँ हुँदा गत आवको नाफाबाट बैंकले सेयरधनीलाई २०.५२ प्रतिशत लाभांश वितरण गर्न सक्ने सम्भावना छ । ११ अर्ब ५६ करोड रुपैयाँ चुक्ता पुँजी रहेको एनआइसीले गत आवमा २ अर्ब २४ करोड रुपैयाँ वितरण योग्य नाफा आर्जन गरेको छ । जसबाट बैंकले सेयरधनीलाई १९.४३ प्रतिशत लाभांश वितरण गर्ने क्षमता राख्छ ।
यस्तै, ८ अर्ब ५७ करोड रुपैयाँ चुक्ता पुँजी भएको स्ट्याण्डर्ड चार्डर्ट बैंकले गत आवमा १ अर्ब ५९ करोड रुपैयाँ वितरण योग्य नाफा कमाएको छ । जसबाट बैंकले १८.५९ प्रतिशत लाभांश वितरण गर्न सक्ने देखिन्छ ।
नेपाल एसबिआई बैंकको चुक्ता पुँजी ९ अर्ब ४९ करोड रुपैयाँ कायम छ । बैंकले गत आवमा आर्जित १ अर्ब ४४ करोड रुपैयाँ वितरण योग्य नाफाबाट सेयरधनीलाई १५.२६ प्रतिशत लाभांश वितरणको क्षमता राख्छ । गत आवमा प्राक्ष्म बैंकले २ अर्ब ३४ करोड रुपैयाँ वितरण योग्य नाफा कमाएको छ । बैंकको चुक्ता पुँजी १६ अर्ब ८ करोड रुपैयाँ कायम हुँदा गत आवको नाफाबाट बैंकले सेयरधनीलाई १४.५९ प्रतिशत लाभांश वितरण गर्न सक्ने देखिन्छ ।
२३ अर्ब ७९ करोड रुपैयाँ चुक्ता पुँजी भएको ग्लोबल आइएमई बैंकले गत आवमा ३ अर्ब १९ करोड रुपैयाँ वितरण योग्य नाफा आर्जन गरेको छ । जसबाट बैंकले सेयरधनीलाई १३.४५ प्रतिशत लाभांश वितरण गर्न सक्ने क्षमता राख्छ ।
एनसीसी बैंकले गत आवमा १ अर्ब ४७ करोड रुपैयाँ वितरण योग्य नाफा कमाएको छ । बैंकको चुक्ता पुँजी ११ अर्ब १३ करोड रुपैयाँ कायम हुँदा गत आवको नाफाबाट बैंकले सेयरधनीलाई १३.२४ प्रतिशत लाभांश वितरण गर्न सक्ने देखिन्छ ।
सानिमा बैंकको चुक्ता पुँजी ११ अर्ब ३२ करोड रुपैयाँ कायम छ । बैंकले गत आवमा १ अर्ब ४६ करोड रुपैयाँ वितरण योग्य नाफा आर्जन गर्दा सेयरधनीलाई १२.९५ प्रतिशत लाभांश वितरणको क्षमता राख्छ ।
गत आवको असार मसान्तसम्म माछापुच्छ्रे बैंकको चुक्ता पुँजी १० अर्ब २५ करोड रुपैयाँ कायम छ । सो अवधिमा बैंकले १४ अर्ब १३ करोड रुपैयाँ वितरण योग्य नाफा आर्जन गरेको हुँदा सेयरधनीलाई १२.९८ प्रतिशत लाभांश वितरण गर्न सक्ने देखिन्छ ।
यस्तै, १२ अर्ब ७० करोड रुपैयाँ चुक्ता पुँजी भएको प्रभु बैंकले गत आवमा १ अर्ब ४१ करोड रुपैयाँ वितरण योग्य नाफा आर्जन गरेको छ । गत आवको नाफाबाट बैंकले सेयरधनीलाई ११.१२ प्रतिशत लाभांश वितरण गर्ने क्षमता राख्छ ।
लक्ष्मी बैंकले गत आवमा १ अर्ब २५ करोड रुपैयाँ वितरण योग्य नाफा आर्जन गरेको छ । सो अवधिमा बैंकको मौज्दात चुक्ता पुँजी ११ अर्ब ५५ करोड रुपैयाँ हुँदा बैंकले सेयरधनीलाई १०.८७ प्रतिशत लाभांश वितरणको क्षमता राख्छ ।
गत आवमा सिटिजन्स बैंकले १ अर्ब ४२ करोड रुपैयाँ वितरण योग्य नाफा आर्जन गरेको थियो । सो अवधिमा बैंकको चुक्ता पुँजी १४ अर्ब २० करोड रुपैयाँ कायम हुँदा सेयरधनीलाई १०.०३ प्रतिशत लाभांश वितरण गर्न सक्ने देखिन्छ । साथै, १० अर्ब ११ करोड रुपैयाँ चुक्ता पुँजी भएको सनराइज बैंकले गत आवमा २५ करोड ६१ लाख रुपैयाँ वितरण योग्य नाफा कमाएको हुँदा सेयरधनीलाई २.५३ प्रतिशत लाभांश वितरण गर्न सक्ने देखिन्छ ।
प्रतिक्रिया दिनुहोस्