यस्तै अवस्था जारी रहे राष्ट्रिय ढुकुटी रिक्तिन्छः थापा

काठमाडौं । त्रिभुवन विश्वविद्यालय, सरस्वती बहुमुखी क्याम्पसले “मौद्रिक नीतिः वर्तमान स्थिति र चुनौतीहरु” विषयक खुला छलफलको आयोजना गरेको छ ।

कार्यक्रममा बोल्दै नेपाल राष्ट्र बैंकका पूर्व कार्यकारी निर्देशक नरबहादुर थापाले चालू खाता र शोधनान्तर घाटा बढ्दै गयो भने राष्ट्रको ढुकुटी रित्तिने बताए । उनले दश महिना आयात धान्न सक्ने विदेशी विनिमय सञ्चिती हुन सक्यो भने देशको आर्थिक अवस्था मजबुत हुने उल्लेख गरे ।
सानिमा बैंकका पूर्व कार्यकारी अधिकृत भुवन दाहालले विश्व अर्थतन्त्रमा वैदेशिक मुद्रा शोधनान्तर स्थिति ३ महिना धान्न सक्ने व्यवहारमा भएपनि नेपालमा ६ महिना थेग्न सक्ने हुनु सकारात्मक भएको टिप्पणी गरे ।

नेपाल उद्योग बाणिज्य महासंघका महाप्रवन्धक गोकर्ण अवस्थीले अहिलेको कमजोर आर्थिक अवस्थाले गर्दा साना तथा मझौला उद्योग सञ्चालन गर्न खोज्ने उद्यमीहरुलाई अत्यन्तै कठिन अवस्था रहेको बताए । उनको भनाइ थियो– पूँजी निर्माणमा निजी क्षेत्रको योगदान करिब ७५ प्रतिशत रहेपनि बैंकहरुमा रकम दिन सक्ने अवस्था छैन । चोरी पैठारीका सामानहरु भित्रिन थालेको छ ।’

छलफल कार्यक्रममा प्राध्यापकहरु, बैंकिङ क्षेत्रका व्यक्तित्वहरु, स्नातकोत्तर तह विविएम र विविएसका विद्यार्थीहरुको सक्रिय सहभागिता रहेको थियो । जल्दाबल्दा विषयहरुमा केन्द्रित भइ छलफल कार्यक्रमलाई नियमित रुपमा अघि सार्दै जाने क्याम्पस प्रमुख डा.गोलमान गुरुङले बताए ।