कर्णालीका मुख्यमन्त्रीको टिप्सः ऋण लिएर सेयरमा लगानी नगर्नु, सानै पुँजीबाट सुरुवात गर्नु

काठमाडौं । कर्णाली प्रदेशस्तरीय पुँजीबजार सचेतना कार्यक्रम प्रदेश राजधानी सुर्खेतको वीरेन्द्रनगरमा सम्पन्न भएको छ ।

नेपाल आर्थिक पत्रकार संघ (नाफिज)को आयोजना तथा मर्चेन्ट बैंकर्स एशोसियसन नेपालको सहयोगमा पुँजीबजारका लगानीकर्ताहरुलाई सचेत गराउने उद्देश्यले आयोजित सचेतना कार्यक्रमलाई सम्बोधन गर्दै कर्णाली प्रदेशका मुख्यमन्त्री जीवनबहादुर शाहीले देशका सातै प्रदेशमध्ये कर्णालीले चालु आर्थिक वर्षको तुलनामा आगामी आर्थिक वर्षको बजेट घटाएर ल्याएको बताए ।

मुख्यमन्त्री शाहीले कर्णाली प्रदेशको बजेट तर्जुमा गर्दा वित्तीय अनुशासनमा विशेष जोड दिएको बताए । मुख्यमन्त्री शाहीले बजेटले अधिकांश पुराना योजनालाई सम्पन्न गर्न जोड दिएको तथा नयाँ ५ प्रतिशत योजना मात्रै अघि सारेको उल्लेख गरे ।

पुँजीबजारमा लगानीकर्ता कम रहेको कर्णालीमा पुँजीबजारको बारेमा सचेतना वृद्धि गर्नु सम्वद्ध निकायहरुले ध्यान दिनु आवश्यक भएकोमा मुख्य मन्त्रीले जोड दिए । उनले नाफा कमाउने लोभमा ऋण लिएर लगानी गर्दा लगानी जोखिममा पर्न सक्ने भन्दै सानो पुँजीबाट लगानीको सुरुवात गर्न लगानीकर्तालाई आग्रह गरे ।

संघीयताको भावनालाई हामीले अझै पनि बुझेका छैनौं भन्दै मुख्यमन्त्री शाहीले संघीयतालाई बलियो बनाउन पनि पुँजीबजारले सहयोग गर्ने उल्लेख गरे ।

नेपाली समाजमा वित्तीय अनुशासन कमजोर भएको उल्लेख गर्दै, लगानीकर्ता, बैंकरहरु तथा व्यवसायीहरुले वित्तीय अनुशासनमा ध्यान दिनु आवश्यक भएकोमा मुख्यमन्त्री शाहीले जोड दिए ।

कार्यक्रममा नेपाल धितोपत्र बोर्डका उपकार्यकारी निर्देशक डा. नवराज अधिकारीले दोस्रो बजारमा लगानीकर्ताहरुको संख्या लगानीकर्ता साक्षरताको अवस्था भने कमजोर रहेको बताए ।

देशव्यापी रुपमा पुँजीबजार सचेतना वृद्धिका लागि नेपाल धितोपत्र बोर्डले सम्वद्ध निकायहरुसँगको सहकार्यमा विभिन्न कार्यक्रमहरु अघि बढाएको डा. अधिकारीले बताए ।

उनले लगानी गर्दा हतारमा नगरी कमतमिा पनि दुई वर्षसम्म पखिर्ने गरी लगानी गर्ने कम्पनीको अध्ययन गरेर मात्र लगानी गर्न लगानीकर्ताहरुलाई आग्रह गरे ।

नेपाल उद्योग वाणिज्य महासंघ कर्णाली प्रदेशका अध्यक्ष पदमबहादुरले शाहीले कर्णाली प्रदेशमा रहेका सेयर बजारका लगानीकर्ताहरुलाई सचेत गर्न सचेतनता सम्बन्धी कार्यक्रमको आवश्यकता रहेकोमा जोड दिए । सेयर बजारको विकासको लागि राज्यले प्रभावकारी नीतिगत व्यवस्थामा सुधार गर्नु आवश्यक रहेको बताए ।

उनले सचेतनता कार्यक्रमले कर्णालीका लगानीकर्ताहरुलाई हौसला प्राप्त भएको बताए ।

नेपाल उद्योग परिसंघ कर्णाली प्रदेशका उपाध्यक्ष विष्णु खड्काले उद्योग धन्दा निराशाजनक अवस्था रहेको बेला पुँजीबजार मार्फत औद्योगिक लगानीका लागि पुँजी संकलन गर्न सेयर बजारलाई प्रभावकारी औजारको रुपमा अघि बढाउनु आवश्यक भएकोमा जोड दिए । हामीले अवलम्वन गरेको आर्थिक नीतिको कारण नेपाल स्वावलम्वी भन्दा आयातमुखी अर्थतन्त्रको नकारात्मक असर परेको बताए ।

कार्यक्रममा नेपाल मचेण्ट बैंकर्स एसोशियसनका अध्यक्ष मेखबहादुर थापाले देशभर पुँजीबजारका लागनीकर्ताहरु बीच सचेतना अभिवृद्धिका लागि नेपाल आर्थिक पत्रकार संघसँगको सहकार्य सचेतना कार्यक्रम संचालन गरेकोले त्यसबाट लाभ दिन लगानीकर्ताहरुलाई आग्रह गरे । नाफिजका अध्यक्ष मोदनाथ ढकालले संघीयताको प्रर्वद्धन गर्न सचेतना कार्यक्रमले सहयोग गर्ने तथा देशभर छरिएर रहेको पुँजीको संकलनका लागि एउटा महत्वपूर्ण माध्यम बन्ने बताए ।