सिंहदरबार संवाददाता
काठमाडौं । धितोपत्र बजारमा सेयर कारोबार मापक नेप्से परिसूचक दुई हजार भन्दा तल झरेको छ । लामो समयदेखि घटिरहेको नेप्से परिसूचक आज पछिल्लो एक वर्षकै तल्लो बिन्दुमा आएको हो ।
सरकारले बजेट सार्वजनिक गरेपछि एकदिन मात्र बढेको नेप्से परिसूचक लगातार ओरालो लागिरहेको छ ।
मंगलबार नेप्से परिसूचक ३६.०७ अंकले घटेर १९ सय ९६ दशमलब २६ को बिन्दुमा बन्द भएको छ । त्यसैगरि ठूला कम्पनीको सेयर मापक सेन्सिटिभ इन्डेक्स ६.४८ अंकले घटेर ३ सय ८३ दशमलव ५१ को बिन्दुमा बन्द भएको छ ।
आज दिनभरीमा २३२ स्क्रिप्टका ४१ लाख ४७ हजार २ सय ५५ कित्ता सेयर १ अर्ब १८ करोड ५५ लाख ४६ हजार रुपैयाँमा खरिदबिक्री भए ।
नेप्से घट्दा हिमालयन पावार कम्पनीको सेयर मूल्यमा नेगेटिभ सर्किट लागेको छ ।
कारोबार रकमको आधारमा शिवम् सिमेन्ट शीर्ष स्थानमा छ । कम्पनीको ४ करोड ६७ लाख १८ हजार रुपैयाँ बराबरको सेयर खरिदबिक्री भए । त्यस्तै एनसीसी बैंक ३ करोड ७९ लाख ७७ हजार रुपैयाँँ सहित दोस्रो र नेपाल लाइफ इन्स्योरेन्स ३ करोड ३३ लाख ५९ हजार सहित तेस्रो स्थानमा छ ।
नेप्से परिसूचक घटेपनि आँधिखोला लघुवित्त वित्तीय संस्थाका लगानीर्कताले भने सर्वाधिक ८.१८ प्रतिशतले कमाएका छन् ।
कारोबारमा आएका ५ कम्पनीको सेयर मूल्य बढ्दा १९० कम्पनीको सेयर मूल्य घटेको छ । समुहगत उपसूचकहरु सबै राताम्य भएका छन् । सबैभन्दा बढी अन्य उपसूचक ३.४४ प्रतिशतले घटेको छ ।
प्रतिक्रिया दिनुहोस्