भोट हाल्नुअघि उम्मेदवारलाई यी १३ प्रश्न सोध्न नभुल्नुस्

स्थानीय निर्वाचनका क्रममा मतदाताले प्रतिस्पर्धामा रहेका उम्मेदवारलाई गर्नुपर्ने प्रश्नः

१. तपाइँ (वा तपाइँको दल) मानवीय विकास तथा सुशासनलाई पहिलो प्राथमिकता दिनु हुन्छ ? गरीव र आर्जन विहीन समुदाय तपाइँको प्राथमिकतामा पर्छ ?

२. स्थानीय युवालाई आफ्नो पालिकामा रही काम गर्ने वातावरण बनाउन तपाइँ वा तपाइँको दलसँग केही भिजन छ ?

३. आफ्नो पालिका वा ठाउँको विकासको प्रमुख अवसर र चुनौती ठम्याउनु भएको छ ? तिनलाई एक एक योजना बनाई पूरा गर्न सकिन्छ ?

४. सामाजिक न्याय भनेर होइन गरेर देखाउन आवश्यक छ । यसतर्फ तपाइँको भावी क्रियाकलाप लक्षित हुनसक्ला ?

५. निर्वाचित भए पछि तपाईंको व्यक्तित्व साझा हुन सक्ला ? अन्य दल वा व्यक्तिको सही र स्वतन्त्र धारणा स्वीकार गर्न सक्नुहुन्छ ?

६. तपाइँलाई विभिन्न स्वार्थ समूहले अनेक बहानामा आफन्त बनाउने चेष्टा गर्छन् । ती छद्म प्रस्ताव तथा मायाजाललाई कसरी चिन्नुहुन्छ ? सहयोगीजस्ता देखिने त्यस्ता पंक्तिबाट कसरी टाढा बस्नुहुन्छ ?

७. आफ्नो क्षेत्रको विशिष्टताको पहिचान आफ्नो मूल्य पहिचान हो । त्यसतर्फ केही सोच बनाउनु भएको छ ?

८. नयाँ पुस्तासँग वातावरण संरक्षण, हरियाली प्रवद्र्धन तथा सूचना प्रविधि आदिको क्षेत्रमा सहकार्य गर्ने सोच छ ? कि तपाइँसँग यस्तो एजेण्डा नै छैन ?

९. निजी क्षेत्रसँग रोजगारी प्रवर्द्धनमा सहकार्य गर्न आवश्यक देख्नुहुन्छ ?

१०. कृषि उत्पादन तथा बजारीकरण, सीप विकास तथा व्यवसायिक वातावरण निर्माण नगरी समृद्धिको दैलो खुल्दैन । त्यसतर्फ केही सोच बनाउनु भएको छ ?

११. सांस्कृतिक, सामाजिक–आर्थिक तथा पर्यटकीय जागरणका उत्सव तथा महोत्सव आदिले समाजलाई जीवन्त र गतिशील बनाउने सन्दर्भमा केही कार्यक्रम तपाइँ वा तपाइँको दलले सोचेको छ ?

१२. भौतिक विकास स्थानीय जनताको सहजता र उन्नयनका लागि तर्जुमा तथा कार्यान्वयन गर्ने उपकरण हो भन्नेमा विश्वस्त हुनुहुन्छ ? यसको परिपक्व प्रणाली विकास गर्न कटिबद्ध हुनुहुन्छ ?

१३. चुनावी संकल्पको वार्षिक समीक्षा गर्नुहुन्छ ? संकल्पमा भएका हावादारी कुरा सच्याउन तयार हुनु हुन्छ ?

यी र यस्ता प्रश्नहरुको जवाफले मतदानमा जनतालाई सही दल तथा उम्मेदवार छान्न सघाउ पुर्‍याउँछ । अन्यथा, चुनाव ‘भागशान्ति जय नेपाल’मा परिणत हुन्छ । आशा गरौँ, जनता सहस्र जालझेल, षड्यन्त्र, प्रलोभन तथा खरीद बिक्रीको ऊहापोह पार गरी सही नेतृत्व छान्न सफल हुनेछन् ।

(नेपाल राष्ट्र बैंकका पूर्व कार्यकारी निर्देशक तथा नेपाल बैंकको सञ्चालक समिति पूर्व अध्यक्ष अधिकारीको फेसबुक वालबाट साभार । शब्द संयोजनः साहित्यिक मासिक ।)