सिंहदरबार संवाददाता
काठमाडौं । नेकपा(माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपाल राष्ट्र बैंकका गभर्नर महाप्रसाद अधिकारीले वर्तमान सरकारलाई सुरुदेखि नै अटेर गर्दै आएको आरोप लगाएका छन्
।
बिहिबार धनगढीमा पत्रकारहरुसँग कुरा गर्दै पूर्व प्रधानमन्त्री समेत रहेका अध्यक्ष प्रचण्डले सरकार र गभर्नरबीच सुरूदेखि नै समस्या देखिँदै आएको बताएका हुन् ।
प्रधानमन्त्री शेर बहादुर देउवाको सहमतिमै गभर्नर अधिकारीलाई निलम्बन गरिएको पनि बताए । ‘सुरूदेखि नै सरकार र गभर्नरबीच कहीँ न कहीँ समस्या देखिएकै हो। प्रधानमन्त्री र अर्थमन्त्रीले मिलेरै गभर्नर हटाउने निर्णय भएको खुलस्त भइसकेको छ,’ प्रचण्डले भने ।
गठबन्धन सरकारले चैत २४ गते नेपाल राष्ट्र बैंकका गभर्नर महाप्रसाद अधिकारीलाई निलम्बन गरेको थियो । तर सर्वाेच्च अदालतले मंगलबार अधिकारीलाई निलम्बन गर्ने निर्णय कार्यान्वयन नगर्न अल्पकालिन अन्तरिम आदेश दिएको थियो ।
सर्वाेच्च अदालतका न्यायधिश हरि फुँयालको एकल इजलासले गभर्नरका पक्षमा अल्पकालिन अन्तरिम आदेश दिएपछि उनी बुधबारदेखि काममा फर्किएका छन् । अदालतले दुबै पक्षलाई छलफलका लागि बैशाख १३ गते बोलाएको छ ।
प्रतिक्रिया दिनुहोस्