विद्युत निर्यात रोक्ने योजनामा सरकार, पर्यटन क्षेत्रको आवश्यकता पूर्ति पहिलो प्राथमिकता

काठमाडौं । उर्जा, जलस्रोत तथा सिँचाई मन्त्री पम्फा भुसालले विदेशमा विद्युत निर्यात रोक्ने योजना सरकारले बनाइसकेको बताएकी छिन् । उनले सरकारले उत्पादित विजुली सकेसम्म स्वदेशमै खपत बढाउने योजना बनाइसकेको जानकारी दिँदै पहिलो प्राथमिकतामा पर्यटन क्षेत्रको खपतलाई राख्ने बताएकी हुन् ।

“हाम्रो पहिलो प्राथमिकता विदेशमा निर्यातभन्दा पनि देशभित्रै खपत वृद्धि गर्ने हो । जसका लागि विजुली नपुगेका क्षेत्रमा राष्ट्रिय प्रसारणको बत्ती पुर्याउने योजनामा सरकार छ । पर्यटन क्षेत्रलाई चाहिएजति बिजुली दिन प्रतिबद्ध छौँ ।”

मन्त्री भुसालले नेपालको समृद्धिको प्रमुख आधारका रूपमा रहेको पर्यटन क्षेत्रलाई आवश्यक विद्युत् सेवा उपलब्ध गराएर सुविधा उपलब्ध गराउन सरकार प्रतिबद्ध रहेको पोखरामा पर्यटक व्यवसायीसँगको भेटघाटमा बताएकी हुन् । भेटमा मन्त्री भुसालले विद्युत् सुविधा नपुगेका क्षेत्रमा विद्युत् विस्तार सरकारको प्राथमिकतामा रहेकाले मर्दी क्षेत्रमा विद्युत् तत्कालै उपलब्ध गराइने प्रतिबद्धता गरेकी थिइन् ।

विश्व प्रसिद्ध मर्दी हिमाल पदयात्रा क्षेत्रमा विद्युतीकरणको मागसहित आएका त्यहाँका पर्यटन व्यवसायीले विद्युत खपतको परिपुर्ति सम्बन्धि गुनासो मन्त्री भुसालसँग राखेका थिए । मन्त्री भुसालले सरकारले उत्पादित बिजुली सकेसम्म स्वदेशमै खपत बढाउने योजना बनाएरै काम अघि बढाएको बताइन् ।

‘सरकारले आगामी दुई वर्षभित्रमा देशभर विद्युतीकरण गरिसक्ने गरी काम अघि बढाएको छ ।’ – मन्त्री भुसालले भनिन् ।

मर्दी क्षेत्रमा पर्यटकको चाप बढेसँगै होटल खुल्ने क्रम वृद्धि भए पनि बिजुली नहुँदा आफूहरू समस्यामा परेको पर्यटन व्यवसायीले गुनासो गरेका थिए । कास्कीमा अवस्थित चर्चित मर्दी हिमाल पदयात्रा क्षेत्रको डुँढखर्क, फरेष्ट क्याम्प, रेष्ट क्याम्प, लो क्याम्प, बादलडाँडा र हाइक्याम्प क्षेत्रमा हाल ५५ वटा होटलमा सञ्चालनमा छन् ।

केही वर्षदेखि यता मर्दी क्षेत्र आन्तरिक तथा बाह्य पर्यटकको रोजाइमा परेको छ । सो क्षेत्रमा विद्युत् विस्तार नहुँदा पर्यटन क्षेत्रमा असर पुगेको गुनासो व्यवसायीको छ । मर्दी क्षेत्रमा विद्युत् विस्तारका लागि सिदिङ वा कालीमाटीको टान्सर्फरबाट माथिल्लो  क्याम्पसम्म हाइटेन्शन लगेर विद्युत् विस्तारका लागि विद्युत् प्राधिकरण पोखराले गत वर्ष सर्भे गरे पनि काम सुरु नभएको मर्दी हिमाल ट्रेक व्यवस्थापन समितिका संस्थापक सचिव एवं मर्दी हिमाल इको भिलेजका सञ्चालक शिवप्रसाद भण्डारीले बबताए ।

उनले विद्युत् सुविधा नहुँदा पर्यटकलाई मोबाइल र क्यामेरा चार्जदेखि इन्टरनेट सुविधा उपलब्ध गराउनसमेत कठिन भएको बताए। फ्रिज, ओभनलगायतका उपकरणसमेत सञ्चालन गर्न नसकिएको भण्डारीको भनाइ छ ।

“मर्दी क्षेत्रको मुख्य समस्या भनेकै बिजुली हो । बिजुली नहुँदा अहिले पर्यटकलाई चाहेजस्तो सुविधा दिन सकिएको छैन । मोबाइल र क्यामेरा चार्ज गर्न पनि समस्या छ । पर्यटक बढेसँगै होटल अत्यधिक बढे तर पर्यटकलाई सुविधा भएन ।”

पदयात्रामार्गको कालिमाटी र घलेल तथा प्रितम देउरालीसम्म मात्र अहिले प्राधिकरणको विद्युत् सेवा पुगेको छ । विद्युत् नपुगेको पर्यटकीय क्षेत्रमा हाल सोलारबाट बत्ती बाल्ने गरिएको छ ।