सिंहदरबार संवाददाता
काठमाडौं । राजस्व अनुसन्धान विभागले क्रिप्टो करेन्सी कारोबार गरी अनलाइन जुवा खेलाएको भन्दै दुई जना विरुद्ध मुद्दा दायर गरेको छ । विभागले विदेशी विनिमयको गैरकानुनी रुपमा प्रयोग गरेको अभियोगमा मोरङका पुष्कर श्रेष्ठ र विनिता लिम्बूविरुद्ध ‘विदेशी विनिमय (नियमित गर्ने) ऐन, २०१९ अनुसार काठमाडौँ जिल्ला अदालतमा सोमबार मुद्दा दायर गरेको हो ।
उनीहरुले नेपालमा प्रतिबन्धित वानएक्सवेट, विनाश, एड्भी क्यास, क्वाइनबेस र प्याक्फुल जस्ता माध्यमको प्रयोग गरी सामूहिक मिलेमतोमा अमेरिकी डलरको गैरकानुनी कारोबार गरेको पाइएको छ । विभागका अनुसार आरोपितले विभिन्न एप तथा गैरकानुनी माध्यममार्फत रकम राख्ने वा पठाउने गरेको पाइएको छ ।
उनीहरुले अमेरिकी डलरको सटही तथा क्रिप्टोमा लगानीकर्ताको रुपमा रहेको अनुसन्धानबाट खुलेको छ । आरोपी श्रेष्ठले मेगा बैंकबाट ८६ लाख ८३ हजार ४२९ रुपैयाँ, सिटिजन बैंकबाट २ करोड ५१ लाख ७६ हजार ९९ रुपैयाँ, एनआइसि एशिया बैंकबाट १ करोड ८२ लाख ४९ हजार ८८९ रुपैयाँ र राष्ट्रिय वाणिज्य बैंकबाट २ करोड ३६ लाख ६२ हजार ५३९ रुपैयाँ गरी कूल ७ करोड ५७ लाख ७१ हजार ९५८ रुपैयाँ बराबरको रकम हिनामिना गरेको पाइएको छ ।
यस्तै, आरोपी लिम्बूले एनआइसि एशिया बैंकबाट २ करोड १६ लाख ९८ हजार २४ रुपैयाँ बराबरको रकम हिनामिना गरेको देखिन्छ । विभागले कूल ९ करोड ७४ लाख ६९ हजार ९८३ रुपैयाँ बराबरको विदेशी विनिमयको अपचलन गरेको अध्ययनमा पत्ता लगाएको छ ।
विभागले आरोपीलाई बिगो जफत गरी सजाय र तीन वर्षसम्मको कैद सजायको मागदाबी गर्दै मुद्दा दायर गरिएको छ । नेपाल राष्ट्र बैंकले २०७४ साउन २९, २०७५ चैत २६ र २०७८ भदौ २४ गते अवैध रुपमा विदेशी विनिमयको अवैध कारोबार नगर्न निर्देशन दिएको छ । यस्तै, नेपालमा गैरकानुनी रहेको क्रिप्टोकरेन्सीको कारोबार नगर्न समेत पटक–पटक केन्द्रीय बैंकले निर्देशन दिएको छ ।
प्रतिक्रिया दिनुहोस्