नेष्डो समृद्धि लघुवित्तको आइपिओ बाँडफाँड, २४ लाख ४५ हजार ४९९ जनाको हातखाली

काठमाडौं। नेष्डो समृद्धि लघुवित्तको धितोपत्रको साधारण सेयर (आईपिओ) बाँडफाँड भएको छ । कम्पनीको धितोपत्र निष्काशन तथा बिक्री प्रबन्धक ग्लोबल आइएमई क्यापिटलले गोलाप्रथामार्फत मंगलबार आइपिओ बाँडफाँड गरेको हो ।

कम्पनीको आइपिओमा माग भन्दा बढी आवेदन परेकोले धितोपत्र निष्कासन तथा बाँडफाँड निर्देशीका अनुसार बाँडफाँड भएको छ । जस अनुसार लघुवित्तको आईपीओमा आवेदन गरेकामध्ये ७७ हजार ४५६ जनाले गोलाप्रथाबाट दश कित्ताका दरले सेयर पाएका छन् । सोहीमध्ये ३ जनाले थप एक एक कित्ता गरि ११ कित्ता सेयर पाएका छन् । बाँकी २४ लाख ४५ हजार ४९९ जनाको आवेदकले भने हातखाली भएको हो ।

फागुन ११ गतेदेखि लघुवित्तले प्रतिकित्ता १०० रुपैयाँ अंकित दरमा कुल ८ लाख २८ हजार ७५० कित्ता आईपीओ बिक्री खुला गरेको थियो । जसमध्ये सामूहिक लगानी कोषका लागि ४१ हजार ४३७ कित्ता र लघुवित्तका कर्मचारीहरुका लागि १२ हजार ७५० कित्ता छुट्याइएको थियो ।

कम्पनीले कर्मचारी र सामुहिक लगानी कोषका लागि सुरक्षित गरी सर्वसाधारणको लागि ७ लाख ७४ हजार ५६३ कित्ताका लागि आवेदन माग गरेको थियो। जसमा २५ लाख २७ हजार १०१ वटा आवेदन परेकोमा ४ हजार १४६ आवेदन भने रद्द भएको बिक्री प्रबन्धकले जनाएको छ ।

रद्ध आवेदन हटाएर सदर भएका २५ लाख २२ हजार ९५५ जनालाई गोलाप्रथामा समावेश गरी सेयर ७७ हजार ४५६ जनालाई १० कित्ता र थप ३ जनालाई १ कित्ता सेयर बाँडफाँड भएको छ । बाँकी रहेका २४ लाख ४५ हजार ४९९ जनाको हातखाली भएको छ ।

कम्पनीको आइपीओको नतिजा ४ वटा साइटहरुबाट  बिक्री प्रबन्धकको वेबसाइट  https://www.globalimecapital.com/ , सिडीएससीकोवेबसाइट, मेरो शेयरको वेबसाइट https://meroshare.cdsc.com.np/#/login, कम्पनीको वेबसाइट https://slbs.nesdonepal.org , र सिडीएसको नयाँ वेबसाइट https://iporesult.cdsc.com.np/ बाट हेर्न सकिने बताइएको छ ।

कम्पनीको गत आर्थिक वर्षको अपरिस्कृत वित्तीय विवरण अनुसार १६ करोड ३३ लाख ८ हजार खुद मुनाफा आर्जन गरेको छ । आव २०७७/०७८ को अपरिस्कृत वित्तीय विवरण अनुसार कम्पनीको सञ्चित मुनाफा २५ करोड ३० लाख ३१ हजार, प्रतिसेयर आम्दानी ९४ रुपैयाँ ८८ पैसा र प्रतिसेयर नेटवर्थ ३५२ रुपैयाँ २३ पैसा छ ।