सिंहदरबार संवाददाता
काठमाडौं । नेपाल राष्ट्र बैंकले आयात निरुत्साहित निर्देशन जारी गरेको छ । केन्द्रीय बैंकले मंगलबार एक परिपत्र जारी गर्दै वस्तु नै तोकेर शत प्रतिशत मार्जिन राख्नु पर्ने व्यवस्था गर्दै ती वस्तुको आयातमा कडाई गरेको हो ।
जारी परिपत्रले विषेशगरी अब गाडी, मदिरा, सुर्ती चुरोट, सिमेन्ट र कस्मेटिक सामान लगायत अन्य विलासिलताका सामानको आयातलाई निरुत्साहित गर्ने प्रष्ट देखिन्छ ।
राष्ट्र बैंकद्वारा जारी परिपत्र अनुसार अब चिनी, चकलेट, मिनिलर वाटर, मदिरा, भिनिगर, चुरोट, सुर्तीजन्य वस्तु, जुत्ता चप्पल आयातमा शत प्रतिशत मार्जिन राखेर प्रतित पत्र ९एलसी० खोलेर मात्र आयात गर्न पाइनेछ । साथै, सिमेन्ट, प्लास्टर र सेरामिक वस्तु, छाता र लाठी, काठका सामानहरु, सुन चादी जस्ता बहुमूल्य धातु, परफ्युम तथा विभिन्न कस्मेटिक सामानहरु आयात गर्न शत प्रतिशत मार्जिन राखेर एलसी खोल्नु पर्ने छ ।
यस्तै, विद्युतिय बाहेकका गाडी, मोटर साइकल आयात गर्न भने ५० प्रतिशत मार्जिन राखी आयात गर्नु पर्ने उल्लेख छ । जारी सकुर्लर अनुसार अब आयातकर्ताले जति मूल्य बराबरको सामान आयात गर्ने हो सोही मूल्य बराबराको बैंक ग्यारेन्टी राख्नु पर्ने राष्ट्र बैंकका प्रवक्ता डा। गुणाकर भट्टले सिंहदरबारलाई जानकारी दिए ।
‘सकुर्लरमा उल्लेखित सामानहरुमध्ये यदी शत प्रतिशत मार्जिन भनिएको सामान आयात गर्नु पर्दा १ सय रुपैयाँ पर्ने हो भने १ सय रुपैयाँ नै बैंकमा ग्यारेन्टी राख्नु पर्छ, ५० प्रतिशत हो भने मूल्यको ५० प्रतिशत बैंकमा राख्नु पर्छ ।’– उनले भने ।
राष्ट्र बैंकले गरेको सो व्यवस्थाले तोकिएको वस्तुहरुको आयातकर्ताका लागि लागत तत्काललाई बढी पर्नेजाने हुँदा आयात निरुत्साहित हुने देखिन्छ । यसले बैंकबाट आयातका लागि जाने टिआर लोन घट्न सक्ने प्रष्ट संकेत दिन्छ ।
प्रतिक्रिया दिनुहोस्