अनुत्पादक क्षेत्रमा कर्जा प्रवाह रोक्न गभर्नरको निर्देशन

काठमाडौं । नेपाल राष्ट्र बैंकका गभर्नर महाप्रसाद अधिकारीले बैंकहरूलाई अनुत्पादक क्षेत्रमा कर्जा प्रवाह नगर्न निर्देशन दिएका छन् । मंगलबार नेपाल बैंकर्स संघको वार्षिक साधारणसभामा उनले संयमित भएर कर्जा विस्तार गर्न तथा आर्थिक वृद्धिमा सहयोग पुग्ने क्षेत्रमा कर्जा लगानी गर्न बैंकहरूलाई निर्देशन दिए ।

“बैंकहरूले धेरै उत्पादनशील क्षेत्रमा कर्जा लगानी गर्नुपर्ने स्थिति आएको छ,” अधिकारीले भने, “बैंकिङ क्षेत्रको वृद्धिदर आर्थिक वृद्धिदरसँग तादम्यता हुनुपर्छ ।”

बैंकहरूले केही समययता वित्तीय सुशासन उलंघन गरेको, कोभिड पछि ६ महिनासम्म कर्जा तिर्ने समय थप गर्दा कर्जा रिकभरी नभएको, कर्जाको विस्तार अत्यधिक भएको कारण तरलतको ठुलो समस्या भएको उनको भनाइ छ ।

गभर्नरले भने, “समग्र आर्थिक क्षेत्र चुनौतिबाट गुज्रिएको छ। वित्तीय क्षेत्रमा समस्या भइरहेकै छ । बैकिङ क्षेत्रमा महामारीमा सुपरभिजन नअुँदा सुशासनमा कमि देखिएको छ ।”