सिंहदरबार संवाददाता
काठमाडौं । नेपालमा तेलको मूल्य बढेको पर्सिपल्टै भारतले इन्धनको नयाँ मूल्यसूची पठाएको छ । नेपाल आयल निगमका अनुसार भारतीय आयल निगम (आईओसी)ले नियमित रूपमा पठाउने मूल्यसूची पठाएको हो ।
भारतबाट हरेक अंग्रेजी महिनाको १ र १६ तारिखमा नयाँ मूल्यसूची पठाउने गरेको छ । नयाँ मूल्यसूची अनुसार नेपाल आयल निगमको खरिद लागत झनै आकासिएको छ । जसअनुसार निगमले डिजेललाई प्रतिलिटर ७ रूपैयाँ ४२ पैसा, मट्ट्रितेललाई ज्ञज्ञ रुपैयाँ २९ पैसा, हवाइ इन्धनलाई ४ रूपैयाँ ११ पैसा र ग्यासलाई प्रतिसिलिन्डर २४६ रूपैयाँ ९७ पैसा बढी तिर्नुपर्नेछ ।
शुक्रबार सार्वजनिक मूल्यसूचीअनुसार तेल बेच्दा अब निगमलाई पेट्रोलमा प्रतिलिटर २० रूपैयाँ ४ पैसा, डिजेलमा १५ रूपैयाँ ६२ पैसा, हवाइ इन्धनमा (आन्तरिकतर्फ) १ पैसा र एलपी ग्यासमा ७२१ रूपैयाँ ६९ पैसा घाटा हुनेछ । मट्ट्रितेल र हवाइ इन्धनमा (अन्तर्राष्ट्रयतर्फ) भने निगलाई नाफा छ ।
निगमका प्रवक्ता विनितमणी उपाध्यायले सिंहदरबारसँग भने, “भारतीय आयल निगमले नियमित पठाउने मुल्यसूची नोभेम्बर १ तारिखमा (आज) पठाएको छ । जसअनुसार निगमले झनै महंगोमा तेल किन्नुपर्ने भएको छ ।”
पुरानो मूल्यसूचीअनुसार १५ दिनमा १ अर्ब ८७ करोड रूपैयाँ घाटा हुने अनुमान गरिएकामा नयाँ मूल्यसूचीले त्यो घाटालाई ह्वात्तै बढाएको जानकारी उनले दिए । “जसअनुसार अब हामीलाई १५ दिनमै ३ अर्ब २ करोड रूपैयाँ घाटा हुनेछ,” प्रवक्ता उपाध्यायले थपे ।
यससँगै निगमको सञ्चिति नाफाको कोष रित्तिने भएको छ । १ वर्षदेखि घाटामा चलेको निगमलाई चालु आर्थिक वर्षको ४ महिना बित्दासम्म ११ अर्ब घाटा भइसक्नेछ ।
निगम प्रवक्ता भन्छन्, “घाटा यति धेरै भयो कि अबको केही समयमात्र निगमले मुस्किलले सञ्चित रकमबाट पैसा थप गरी तेल मगाउन सक्छ तर, त्यो लामो समय रहँदैन ।”
प्रतिक्रिया दिनुहोस्