बैंकको निक्षेप १६ दिनमा करिब ५८ अर्ब रुपैयाँ थपियो, कर्जा भने निक्षेपको ५५% बढी थप विस्तार

काठमाडौं । निक्षेपको ब्याजदर बढाएसँगै १६ दिनमै बैैंकहरुमा पौने ५८ अर्ब रुपैयाँ थपिएको छ । बैंक तथा वित्त कम्पनीहरुले थप गरेको निक्षेपभन्दा ५४.७१ प्रतिशतले थप कर्जा प्रवाह गरेका छन् ।

प्रणालीमा तरलता अभाव हुँदै गएपछि अधिकांश बैंक तथा वित्त कम्पनीले असोज १ गतेदेखि लागू हुने गरी निक्षेपको ब्याजदर ०.१ प्रतिशतदेखि ५ प्रतिशतसम्मले बढाएका थिए ।

यसबीचमा बैंकिङ प्रणालीमा ५७ अर्ब ७४ करोड रुपैयाँ निक्षेप थप हुँदा ८९ अर्ब ३३ करोड रुपैयाँ थप कर्जा प्रवाह भएको नेपाल राष्ट्र बैंकको तथ्यांकले देखाएको छ ।
गत भदौ मसान्तसम्म बैंक तथा वित्त कम्पनीले ४७ खर्ब १ अर्ब २० करोड रुपैयाँ निक्षेप संकलन गरेका थिए । जसमा वाणिज्य बैंकहरुले ४१ खर्ब १३ करोड रुपैयाँ, विकास बैंकहरुले ४ खर्ब ५० अर्ब ९४ करोड रुपैयाँ र वित्त कम्पनीहरुले ९१

अर्ब १५ करोड रुपैयाँ निक्षेप संकलन गरेका थिए । जसमा असोज १६ गतेसम्म आइपुग्दा वाणिज्य बैंकहरुले ५१ अर्ब ९६ करोड रुपैयाँ, विकास बैंकहरुले ७ अर्ब ३९ करोड रुपैयाँ निक्षेप थप गरेका छन् । तर, वित्त कम्पनीहरुको भने यस अवधिमा १ अर्ब ६१ करोड रुपैयाँले निक्षेप घटेको राष्ट्र बैंकको तथ्यांकले देखाएको छ ।

यसैगरी, बैंक तथा वित्त कम्पनीले गत भदौ मसान्तसम्म ४३ खर्ब ३७ अर्ब २६ करोड रुपैयाँ कर्जा प्रवाह गरेका थिए । जसमा असोज १६ गतेसम्म ८९ अर्ब ३३ करोड रुपैयाँले थप भएको हो ।

सो अवधिमा वाणिज्य बैंकहरुले ३८ खर्ब ६३ अर्ब ६६ करोड रुपैयाँ, विकास बैंकहरुले ४ खर्ब २ अर्ब ७७ करोड र वित्त कम्पनीहरुले ७० अर्ब ८३ करोड रुपैयाँ कर्जा प्रवाह गरेका हुन् । जसमा असोज १६ गतेसम्म आइपुग्दा वाणिज्य बैंकहरुले ७५ अर्ब ८४ करोड, विकास बैंकहरुले १० अर्ब ७५ करोड र वित्त कम्पनीहरुले २ अर्ब ७४ करोड रुपैयाँले थप कर्जा प्रवाह गरेका हुन् ।