सिंहदरबार संवाददाता
काठमाडौं । हिमालयन बैंक र नेपाल इन्भेस्टमेन्ट बैंकबीच हुने भनिएको ‘बिग मर्जर’ तोकेको समयमा सम्भव हुन सकेन । नेपाल राष्ट्र बैंकबाट असार ६ गते मर्जरको सैद्धान्तिक स्वीकृति पाएको मर्जरले ३ महिना बित्दा पनि मुर्तरुप लिन नसकेको हो ।
३ महिना बित्दा पनि एकीकृत कारोबार सुरु हुन नसकेपछि दुई बैंकले राष्ट्र बैंकलाई समय थपिदिन अनुरोध गरेका छन् ।
सैद्धान्तिक सहमति पाएको ३ महिनाभित्र एकीकृत कारोबार सुरु गरिसक्नुपर्ने व्यवस्था छ । त्यसो हुन नसके समय थप गरिदिन दुवै बैंकका सञ्चालक समितिले राष्ट्र बैंकलाई छुट्टाछुट्टै आग्रह गर्नुपर्छ ।
“सैद्धान्तिक सहमति भएको ३ महिनाभित्रै एकीकृत कारोबार हुन नसक्ने भन्दै समय बित्नुअघि नै समय थपिदिन राष्ट्र बैंकलाई अनुरोध आएको छ,” केन्द्रिय बैंकका प्रवक्ता देवकुमार ढकालले सिंहदरबारसँग भने ।
पछिल्लो समय हिमालयन बैंकका अध्यक्ष रहेका तुल्सीप्रसाद गौतम विवादमा तानिएपछि मर्जर पेचिलो बनेको छ ।
दुई बैंकको मर्जर अहिलेसम्मकै ठूलो मर्जर हो । उनीहरूबीच वेशाख ३० गते नै मर्जरको सम्झौता भएको हो । हिमालयन बैंकका तत्कालीन अध्यक्ष गौतम र नेपाल इन्भेस्टमेन्ट बैंकका अध्यक्ष पाँडेले बिग मर्जरको सम्झौतापत्रमा हस्ताक्षर गरेका हुन् ।
त्यतिबेलै दुई बैंक मिलेर बन्ने नयाँ बैंक ‘हिमालयन एन्ड नेपाल इन्भेस्टमेन्ट बैंक’को एकीकृत कारोबार २ महिनाभित्र सुरू हुने बताइएको थियो ।
नयाँ बैंकको अध्यक्ष इन्भेस्टमेन्टका पृथ्वीबहादुर पाँडे र प्रमुख कार्यकारी अधिकृत हिमालयन अशोक राणा हुने तय भएको थियो । इन्भेस्टमेन्ट बैंकका प्रमुख कार्यकारी अधिकृत ज्योति प्रकाश पाण्डे नयाँ बैंकको डेपुटी सीईओ हुने सहमति भएको थियो ।
यसअघि हिमालयन बैंकले कुनै पनि बैंक तथा वित्तीय संस्था मर्ज वा प्राप्ति गरेको थिएन भने इन्भेस्टमेन्टले एस डेभलपमेन्ट बैंक, जेबिल्स फाइनान्स र सिटी एक्स्प्रेस फाइनान्स एक्वायर गरेको थियो ।
१ बराबर १ को स्वाप रेसियोमा मर्ज भएका दुई बैंक मिलेर बन्ने नयाँ बैंकको चुक्तापुँजी करिब २७ अर्बको हुनेछ ।
यी दुईको मर्जर हुन नसके दुवैले छुट्टाछुट्टै पार्टनर खोज्नुपर्ने हुन्छ ।
यसअघिः
प्रतिक्रिया दिनुहोस्