सिंहदरबार संवाददाता
काठमाडौं । विवादमा मुछिएका नेपाल धितोपत्र बोर्डका अध्यक्ष भीष्मराज ढुंगाना अदालत गएका छन् । निलम्बनमा परेपछि आफूले गैरकानूनी काम नगरेको भनदै उनी अदालत गएका हुन् ।
ढुंगानाले मन्त्रिवरिषदबाट भएको आफ्नो निलम्बनविरूद्ध उत्प्रेषण मुद्दा हालेका हुन् । प्रधानमन्त्री तथा मन्त्रीपरिषदको कार्यालयलाई विपक्षी बनाएर भदौ २३ गते दायर भएको रिटमा २९ गते सर्वोच्चले सुनुवाइ गरेको छ । सर्वोच्चका न्यायधीश कुमार रेग्मीको एकल इजालासले सरकारको नाममा कारण देखाउ आदेश जारी गरेको हो ।
मुद्दामा ढुंगानाले स्टे अर्डरको अन्तरिम आदेश माग गरेका थिए । सर्वोच्चले सरकारी पक्ष र ढुंगाना दुवैको कुरा सुनेर मात्र अन्तरिम आदेश दिने जनाएको हो ।
बुक बिल्डिङ विधिबाट धितोपत्रको सार्वजनिक निष्कासन गर्ने क्रममा रहेको सर्वोत्तम सिमेन्टको सेयर खरिद विषयमा सरकारले छानविन गरिरहेको छ ।
भदौ १६ गते बसेको मन्त्रिपरिषद् बैठकले ढुंगानालाई निलम्बन गर्दै ३ सदस्यिय छानबिन समिति गठन गरेको थियो । उच्च अदालतका पूर्वन्यायाधीश अनन्तराज डुम्रेको अध्यक्षतामा बनेको समितिमा विज्ञ सदस्य प्रा. नारायणप्रसाद पौडेल, कानुन आयोगका सहसचिव अर्जुनकुमार खड्का सदस्य छन् ।
सर्वोच्चले अन्तरिम आदेश दिनुअघि दुवै पक्षलाई छलफल गर्न बोलाएको छ ।
प्रतिक्रिया दिनुहोस्