बैंकको ब्याजदर र घरभाडाले व्यवसायीलाई पिरोलेको छः वरिष्ठ उपाध्यक्ष ढकाल

मोरङ । नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले मुलुकको उद्योग व्यवसायका क्षेत्रमा देखा परेका समस्या हल गर्न देशका समग्र व्यवसायीहरुको छाता संस्थाको हैसियतले महासङ्घले पहल गरिरहेको बताएका छन् ।

उर्लावारी उद्योग वाणिज्य सङ्घको ३३औँ वार्षिक साधारणसभाको उद्घाटन गर्दै वरिष्ठ उपाध्यक्ष ढकालले कोभिडका कारण देशभरका समग्र व्यवसायी मारमा परेको बताउँदै व्यवसायीका समस्याको समाधान गरी व्यवसायीको उत्थानका लागि महासङ्घले नेपाल सरकारसँग राहतका कार्यक्रमका लागि पहल भइरहेको बताए ।

कोभिडको महामारीका कारण सबैक्षेत्र प्रभावित भएपनि अर्थतन्त्रको ठूलो हिस्सा धान्दै आएका देशका निजी क्षेत्रका व्यवसायी अहिले नराम्ररी प्रभावित बनेका उनले बताए। ढकालले भने “देशको व्यवसाय कोरोना महामारीका कारण निकै नै प्रभावित छ । बैंकको व्याजदेखि घरभाडासम्मका कुरा आउँछन् । आम व्यवसायीका समस्यालाई समाधान गर्ने हाम्रो पहल हुनेछ । यसका लागि सरकारलाई हामीले बारम्बार घच्घच्याइरहेका छौँ ।”

महासङ्घले महिला उद्योगीहरुको उत्थान र समग्र व्यवसायीहरुको वृहत्तर हितका लागि निरन्तर काम गरिरहेको पनि जानकारी दिनुभयो । कार्यक्रममा महासङ्घका प्रदेश नम्वर १ का अध्यक्ष टीकाराज ढकाल, उर्लावारी नगरपालिकाका प्रमुख खड्ग फागो, उपप्रमुख लक्ष्मीदेवी भण्डारी, उर्लावारी उद्योग वणिज्य संघका पूर्व अध्यक्ष तेजकुमार रिजाल लगायतले देशका व्यवसायीका समस्या समाधानका लागि नेपाल सरकारसँग पहल गर्न वरिष्ठ उपाध्यक्ष ढकालसँग आग्रह गरे । सो कार्यक्रममा यस क्षेत्रका उत्कृष्ट पाँच व्यवासायी र एक जना सञ्चारकर्मीलाई सम्मान गरिएको थियो ।

सङ्घको नेतृत्व चयनका लागि बिहीबार निर्वाचन हुने उर्लावारी उद्योग वाणिज्य सङ्घका अध्यक्ष प्रितम खड्गीले बताए। सोह्र पदका लागि ३३ जनाको उम्मेद्वारी रहेकाले बिहीबार निर्वाचन हुने बताइएको छ । निर्वाचनका लागि तारामान लिम्बू र शेरबहादुर भण्डारीको टिम चुनावी मैदानमा छ । सङ्घमा एक हजार ७०२ सदस्य आबद्ध छन् । उनीहरु निर्वाचनमा सहभागी हुने बताइएको छ । रासस