सिंहदरबार संवाददाता
काठमाडौं । नेपाल टेलिकमको सेवा प्रवाहका विषयमा प्राविधिक परीक्षणसहित पारदर्शिताको माग गर्दै तीन कर्मचारी सङ्घ सङ्गठनले यही साउन ७ गतदेखि धर्नामा उत्रेका छन् ।
फोरजी, एफटिटीएच, आइपिटिभी, आरटिडीएफलगायतका टेलिकमका चालु परियोजनाको अवस्था सम्बन्धमा श्वेतपत्र जारी गरी यी सेवाको प्राविधिक परीक्षण गरिनुपर्ने माग गरिएको नेपाल टेलिकम वर्कर्स युनियनका अध्यक्ष राजेन्द्रप्रसाद जोशीले राससलाई जानकारी दिए । कम्पनीका प्रबन्ध निर्देशकको कार्य सम्पादन सम्झौता सार्वजनिक गरी आवधिक मूल्याङ्कन गराउन पनि कर्मचारी सङ्घ सङ्गठनले माग गरेका छन् ।
टेलिकम बोर्डले एकपक्षीयरुपमा कर्मचारी हक, अधिकारको विषय कटौती गरी निरङ्कुश चरित्र प्रदर्शन गरेकाले सच्याउनसमेत माग गरिएको छ । तह नौसम्म कर्मचारी सङ्घ सङ्गठनको सदस्यता लिएर आधिकारिक ट्रेड युनियनको निर्वाचनमा भाग लिन पाउने व्यवस्थालाई एकपक्षीयरुपमा सात तहमा झारिएकामा कर्मचारीले आपत्ति जनाएका छन् । विगत दुई वर्षदेखि नै आधिकारिक ट्रेड युनियनको निर्वाचन नगरी टेलिकम व्यवस्थापनले कर्मचारीको प्रजातान्त्रिक अधिकार कुण्ठित गर्न खोजेको आरोप छ ।
नेपाल टेलिकम वर्कर्स युनियन, नेपाल दूरसञ्चार राष्ट्रिय कर्मचारी सङ्गठन र नेपाल टेलिकम कर्मचारी युनियनले यही साउन ७ गतेदेखि टेलिकमको केन्द्रीय कार्यालय भद्रकालीप्लाजा परिसरमा धर्ना जारी राखेका छन् । माग पूरा नभएसम्म आन्दोलन जारी रहने जनाइएको छ । मागका विषयमा टेलिकम सञ्चालक समितिका अध्यक्षसमेत रहेका सञ्चार तथा सूचना प्रविधि मन्त्रालयका सचिवलाई भेटेर जानकारी गराउन लागिएको जनाइएको छ ।रासस
प्रतिक्रिया दिनुहोस्