मैलुङ खोलाको आईपीओ बाँडफाँड आज, करिव २० लाख ५० हजारको हात खाली हुने

काठमाडौं । मैलुङ खोला जलविद्युत कम्पनी लिमिटेडको (आईपीओ) आज बाँडफाँड हुँदैछ ।
अहिले बिहान ९ बजे बिक्री प्रबन्धक सिद्धार्थ क्यापिटलको कार्यालयमा आईपीओ बाँडफाँड गरिने सिद्धार्थ क्यापिटलले जनाएको छ ।

कम्पनीले साउन १४ गतेदेखि साउन १९ गतेसम्म ७ करोड ३६ लाख २८ हजार ६ सय रूपैयाँ बराबरको ७ लाख ३६ हजार २ सय ८६ कित्ता सेयर जारी गरेको थियो । माग भने २१ लाख १८ हजार ९२५ वटा आवेदन मार्फत २ करोड ८४ लाख ४१ हजार ८ सय ४० कित्ताका लागि परेको छ । दोहोरो आवेदन र रितपूर्वक नपरेको आवेदन केही संख्यामा रद्द भएपनि करिव २० लाख ५० हजार ४५१ जनाको हातभने खालीनै हुने देखिन्छ ।

कम्पनीले प्रतिकित्ता १०० रुपैयाँ अंकित दरमा कुल ७ लाख ३६ हजार २८६ कित्ता सेयर निष्कासन तथा बिक्री खुल्ला गरेको हो । जसमध्ये २ प्रतिशत अर्थात १४ हजार ७२६ कित्ता कम्पनीका कर्मचारीहरुका लागि र ५ प्रतिशत अर्थात ३६ हजार ८१४ कित्ता सामूहिक लगानी कोषलाई छुट्टाएर बाँकी रहेको ६ लाख ८४ हजार ७४६ कित्ताका लागि सर्वसाधारणबाट आवेदन मागिएको थियो ।

धितोपत्र निष्काशन तथा बाँडफाँड निर्देशिका बमोजिम हुने बाँडफाँडमा कम्पनीको आईपीओ ६८ हजार ४७४ जनाले गोलाप्रथाबाट १० कित्ताका दरले पाउनेछन् । यसरी बाँडफाँड गरी बाँकी रहने ६ कित्ता शेयर गोलाप्रथाबाट शेयर पाउनेमध्येबाट ६ जनालाई थप १/१ कित्ता गरी ११ कित्ताका दरले बाँडफाँड हुनेछ ।