सिंहदरबार संवाददाता
सिरहा । लहान नगरपालिकाले आर्थिक वर्ष २०७८/०७९ का लागि कूल रु एक अर्ब ९४ करोड ४४ लाख १५ हजार ३९८ बजेट पारित गरेको छ ।
नगरसभाबाट पारित नीति तथा कार्यक्रमबारे जानकारी गराउने उद्देश्यले आज यहाँ आयोजित पत्रकार सम्मेलनमा नगरप्रमुख मुनी साहले कूल बजेटमध्ये चालुतर्फ ८२ करोड ३९ लाख ४० हजार र पुँजीगततर्फ १ अर्ब १२ करोड ४ लाख ७५ हजार ३५८ रहेको बताए ।
उनले आन्तरिक श्रोततर्फ ६२ करोड ११ लाख ८१ हजार, नगद आयतर्फ ४० करोड, सामानीकरण अनुदानतर्फ २२ करोड ३१ लाख, सशर्त अनुदान चालुतर्फ ३४ करोड ५२ लाख, सशर्त अनुदान पुँजीगततर्फ २ करोड २ लाख, विशेष अनुदान पुँजीगततर्फ २ करोड ८३ लाख, समपूरक अनुदान पुँजीगततर्फ १ करोड १४ लाख र राजस्व बाँडफाँडतर्फ १३ करोड ९६ लाख गरी कूल १ अर्ब ९४ करोड ४४ लाख १५ हजार ३९८ बजेट पारित भएको जानकारी दिए ।
बजेटमा नगरपालिकाको मुख्य बजारलाई कलर सिटी बनाउन एक करोड, कृषकलाई विद्युत् महसुल निःशुल्क गर्न ७० लाख, सार्वजनिक ऐलानी जग्गा नियन्त्रण, संरक्षण तथा विकासका लागि १ करोड, ज्येष्ठ नागरिक तथा एकल महिलाका लागि १० लाख, टोल विकास सुधार सञ्चालन परिचालनका लागि ३० लाख, उद्योग तथा कृषिमा आधारित युवा रोजगारका लागि २५ लाख र महिला उद्यम विकासका लागि १५ लाख विनियोजन भएको उनले बताए ।
यसैगरी आँपको राजधानीका रुपमा चिनिएको लहानको पहिचानलाई अन्तर्राष्ट्रिय स्तरसम्म पुर्याउन ‘आँप पार्क’ निर्माण गर्ने नीति नगरपालिकाले लिएको छ ।
त्यस्तै एतिहासिक तथा धार्मिक पर्यटकीय पहिचान बोकेका सलहेश, राजदेवी, दिनाभद्री, ब्रहमान स्थान, देवीदहलगायत स्थानको संरक्षण, सम्वद्र्धन र विकासका लागि आवश्यक बजेट विनियोजन गरिएको नगरपालिकाका प्रमुख प्रशासकीय अधिकृत खेमनन्द भुषालले जानकारी दिए । रासस
प्रतिक्रिया दिनुहोस्