सिंहदरबार संवाददाता
काठमाडौं । स्वास्थ्य तथा जनसंख्यामन्त्री प्रदीप पौडेलले नागरिकको योगदानमा आधारित बीमा प्रणालीको विकास गर्नुको विकल्प नरहेको बताएका छन् । बुधबार भक्तपुर क्यान्सर अस्पतालमा १४ वर्ष मुनिका क्यान्सर बिरामीलाई नि:शुल्क उपचार सेवाको शुभारम्भ गर्दै उनले यस्तो बताएका हुन् ।
उनले नागरिकको सहभागिता हुनेगरी नि:शुल्क स्वास्थ्य सेवा उपलब्ध गराउने स्थिति बनाउनुपर्ने बताए । उनले स्वास्थ्य मन्त्रालयले मात्रै लागू गरेर बीमा प्रणालीको विकास नहुने भन्दै निजी क्षेत्र र अन्य सम्बन्धित निकायहरुले पनि सहयोग गर्नुपर्ने जानकारी दिए ।
उनले नेपालमा संगठित क्षेत्रमा, सरकारी क्षेत्रमा काम गर्नेहरुले तलवबाट दुई प्रतिशत बीमा बोर्डमा दिए बीमा कार्यान्वयनमा सहज हुने उल्लेख गरे ।
आजबाट भक्तपुर क्यान्सर अस्पताल, भक्तपुर, विपी कोईराला क्यान्सर अस्पताल, चितवन, कान्ति बाल अस्पताल, महाराजगञ्ज गरी तीन वटा अस्पतालहरुमा १४ वर्ष मुनिका क्यान्सरको समस्या भएका बालबालिकाहरुको नि:शुल्क उपचार हुने पनि मन्त्री पौडेलले जानकारी दिए ।
मन्त्री पौडेलले माघ २२ गते क्यान्सर निरोधक दिवसको दिन नेपालका १६ लाख किशोरीहरुलाई एचपिभी भ्याक्सिन दिने कार्यक्रम तय गरेको जानकारी दिए ।
प्रतिक्रिया दिनुहोस्