सिंहदरबार संवाददाता
बागलुङ । गण्डकी प्रदेशको प्रसिद्व धार्मिक पर्यटकीयस्थल बागलुङ कालिका कान्दिरमा कात्तिकमा ३५ लाख भेटी सङ्कलन भएको छ । अघिल्लो महिनाको तुलनामा कात्तिकमा १० लाख कम भेटी सङ्कलन भएको छ । बागलुङ कालिका मन्दिरमा बडा दसैँको असोजमा रु ४५ लाख २७ हजार भेटी सङ्कलन भएको थियो ।
कालिका भगवती मन्दिर गुुठी व्यवस्थापन समिति बागलुङले मासिक रुपमा हिसाब किताब सार्वजनिक गर्दै आएको छ । जसअन्तर्गत कात्तिकमा ३५ लाख भेटी र अन्य आम्दानी भएको र १६ लाख खर्च भएको कालिका भगवती मन्दिर गुठी व्यवस्थापन समिति बागलुङका अध्यक्ष कुमार खड्काले जानकारी दिए ।
‘अघिल्लो महिना दसैँको समय भएकाले १० लाख भेटी बढी सङ्कलन भएको थियो, कात्तिकमा धार्मिक पर्यटकले मन्दिर भरिभराउ भएको थियो’ खड्काले भने, ‘मन्दिरको मुख्य आम्दानीको स्रोत भेटी हो, अन्य घरभाडालगायतको आम्दानी हुन्छ, आम्दानीबाट मन्दिरले तलब भत्तासहित पूर्वाधारमा लगानी गर्दै आएको छ ।’
कात्तिकमा ३५ लाख तीन हजार तीन सय ३२ आम्दानी भएको र १६ लाख १५ हजार खर्च भएको छ भने १८ लाख ८८ हजार तीन सय ३२ बचत भएको खड्काले बताए ।
आम्दानीमा भक्तजनले समर्पण गरेको भेटीबाट २२ लाख ३५ हजार पाँच सय ८५, चामल बिक्रीबाट ८० हजार पाँच सय, बोकाबाट ६१ हजार सात सय ५०, कुखुराबाट ४ हजार आठ सय, राँगोबाट १ हजार आठ सय, सटर भाडा ३ लाख १४ हजार पाँच सय ४०, विवाहबाट एक हजार, आर्थिक सहयोग १ लाख २० हजार सात सय सात, परेवा बिक्रीबाट ६ लाख ७० हजार सात सय ५० व्रतबन्धबाट ६ सय, पण्डितबाट ११ हजार चार सय आम्दानी भएको अध्यक्ष खड्काले बताए ।
मन्दिर व्यवस्थापन समितिअन्तर्गत कात्तिकमा १६ लाख १५ हजार खर्च भएको छ । खर्चअन्तर्गत कर्मचारीको तलबमा चार लाख आठ हजार पाँच सय, बिजुलीमा ५० हजार, अतिथि सत्कारमा एक लाख ५५ हजार, उपहारमा एक लाख, पूर्वाधार विकासमा छ लाख १० हजार नौ सस, पोसाकमा २६ हजार, खाद्यान्नमा र आवासमा ८५ हजार पाँच सय, विज्ञापनतर्फ १८ हजार पाँच सय, सांस्कृतिक कार्यक्रममा रु एक लाख ६० हजार छ सय खर्च भएको कालिका गुठीका कुमार खड्काले बताए ।
पछिल्लो समय मन्दिरमा धार्मिक पर्यटकको चहलपहल बढेको छ । दसैँयता मुक्तिनाथ जाने, ढोरपाटन जाने पर्यटक कालिका मन्दिर आउँदा मन्दिरमा दैनिकजसो भीड लाग्ने गरेको छ ।
प्रतिक्रिया दिनुहोस्