सुजुकीको ई भितारा सार्वजनिक, सिंगल चार्जमै ५०० किलोमिटर गुड्ने

काठमाडौं । विश्व बजारका लागि प्रतिष्पर्धी कार निर्माता कम्पनी सुजुकीले आफ्नो बहुप्रतिक्षित विद्युतीय कार ‘सुजुकी ई भितारा’ सार्वजनिक गरेको छ । इटालीको मिलानमा आयोजित अटो शोमा कम्पनीले आफ्नो ग्लोबल प्रडक्ट ई भितारा सार्वजनिक गरेको हो ।

मारुतीले आफ्नो पहिलो विद्युतीय कारलाई ग्लोबल प्रडक्टका रुपमा अघि सारेको छ, जुन अघिल्लो बर्ष कम्पनीले कन्सेप्ट पेपरका रुपमा अघि सारेको थियो ।

यो कारको उत्पादन अब भारतको गुजरातस्थित मारुती सुजुकीको प्लान्टमा पनि हुनेछ । गुजरात प्लान्टमा उत्पादित ५० प्रतिशत कार भने युरोप र जापानी बजारमा निर्यात हुनेछन् ।

सन २०२५ मार्चमा भारतमा सुजुकी ई भिताराको बिक्रि सुरु गर्ने कम्पनीको योजना रहेको छ । कम्पनीले यो कारलाई एसयुभी सेगमेन्टमा निर्माण गरेको हो ।

ई भितारा एसयुभीको लम्बाई ४२७५ मि.मि.छ भने चौँडाई १८०० मि.मि. छ । यो कारको उचाई भने १६३५ मि.मि. रहेको छ । यसमा २७०० मि.मि.को ह्विलबेस र १८० मि.मि.को ग्राउण्ड क्लियरेन्स रहेको छ ।

ई भिताराको तौल १७०२ किलोग्राम देखि १८९९ किलोग्रामसम्मको छ, जुन अलग अलग भेरियन्ट अनुसार फरक फरक पाउन सकिन्छ ।

ई भितारा ४९ किलोवाट र ६१ किलोवाट क्षमतामा निर्माण गरिएको छ । ६१ किलोवाट क्षमताको ई भिताराले ग्लोबल टेष्टमा एक पटकको फुल चार्जले ५०० किलोमिटर रेञ्ज उपलब्ध गराएको कम्पनीको दावी छ ।

पावर र फरफरमेन्स

फ्रन्ट एक्सलको सिंगल मोटरमा रहने ४९ किलोवाटको ब्याट्रीले १४४ एचपीको पावर जेनेरेट गर्नेछ भने सिंलल मोटरकै ६१ किलोवाट ब्याट्रीले १७४ एचपीसम्मको पावर दिन्छ । यी दुबै भर्सनले १८९ एनएमको टर्क सिर्जना गर्छन् ।

यसमा डुअल स्क्रिन अपरेटिङ सिस्टम जडान गरिएको छ ।