सिंहदरबार संवाददाता
काठमाडौं । नेपाल एशोशिएसन फर सफ्टवेयर एण्ड आईटी सर्भिसेस कम्पनीज् (नास आईटी) ले दुई नयाँ पाठ्यक्रमहरू सुरू गरेको छ । नास आईटीले गत शुक्रबार नेपालका आईटी कार्यबलहरूको सीप बढाउने उद्देश्यले दुई पाठ्यक्रमहरू सुरू गरेको हो ।
यी पाठ्यक्रमहरू, DevOps Fundamentals र Mastering Web Application Development यूएसएआइडीको सहायतामा विकसित गरिएको हो । नास आईटीले यी पाठ्यक्रमहरू कार्यान्वयन गर्न टेक आक्सिस र प्रेसिडेन्सियल ग्राजुएत स्कूलसँग साझेदारी गरेको छ । टेक आक्सिसले Mastering Web Application Development कार्यक्रम सञ्चालन गर्नेछ भने प्रेसिडेन्सियल ग्राजुएट स्कूलले DevOps Fundamentals पाठ्यक्रममा ध्यान केन्द्रित गर्नेछ ।
दुबै संस्थाहरूले सम्भावित सहभागीहरूलाई यी पाठ्यक्रमहरू प्रवर्धन गर्न महत्त्वपूर्ण भूमिका खेल्ने कम्पनीले जनाएको छ । DevOps Fundamentals पाठ्यक्रम अन्तिम वर्षका विद्यार्थीहरूका लागि तयार गरिएको हो, जसले तिनीहरूलाई व्यावहारिक DevOps सीप प्रदान गर्दछ। DevOps का सिद्धान्तहरू र कार्यप्रणालीहरू बुझेर विद्यार्थीहरू आधुनिक सफ्टवेयर विकासमा योगदान दिन तयार हुनेछन्।
Mastering Web Application Development पाठ्यक्रम आईटी व्यवसायी र कर्मचारीहरूलाई वेब एप्लिकेशन विकासमा उच्चस्तरको सीप प्रदान गर्न डिजाइन गरिएको हो । सहभागीहरूले उन्नत प्रविधिहरू, उत्कृष्ट अभ्यासहरू र उद्योगका प्रवृत्तिहरू सिक्नेछन् जसले उदाहरणीय वेब एप्लिकेशनहरू बनाउन सक्षम बनाउने कम्पनीले जनाएको छ।
‘नास आईटी जनशक्ति विकास र शैक्षिक क्षेत्र र उद्योग बीचको सहकार्यलाई प्रोत्साहन गर्न प्रतिबद्ध छ’नास आईटीका कैलाश राज विजयनन्द, सञ्चालक सदस्य ले भने, ‘यी पाठ्यक्रमहरूले आईटी जनशक्तिलाई आजको प्रविधि-चालित संसारमा फस्टाउन आवश्यक सीपहरू प्रदान गर्ने छ। हामी विश्वास गर्छौं कि यी कार्यक्रमहरूले नेपालको आईटी उद्योगको विकासमा महत्त्वपूर्ण योगदान पुर्याउनेछन्।’
यस कार्यक्रमको उद्घाटन काठमाडौंको होटल सोल्टीमा गरिएको थियो जसमा नास आईटी, यूएसएआइडी, सरकारी निकाय, शैक्षिक क्षेत्र, आईटी उद्योगका प्रतिनिधिहरू र अन्य सरोकारवालाहरुको उपस्थिति थियो। नेपाल एशोसिएसन फर सफ्टवेयर एन्ड आईटी सर्भिसेज कम्पनीज (नास आईटी) नेपालमा आईटी उद्योगको विकास र प्रवर्धन गर्न समर्पित गैर-नाफामूलक संस्था हो । नास आईटीले आईटी व्यवसायहरूको लागि अनुकूल वातावरण सिर्जना गर्न, नवप्रवर्तनलाई प्रोत्साहन गर्न र आईटी व्यवसायीहरूको सीपहरू बढाउँन कार्य गर्दछ।
प्रतिक्रिया दिनुहोस्