सिंहदरबार संवाददाता
काठमाडौं । प्रधानमन्त्री केपी शर्मा ओलीका आर्थिक तथा विकास सल्लाहकार डा. युवराज खतिवडाले बैंक तथा वित्तिय संस्थाहरुले आवश्यकता भन्दा धेरै अटो लोन दिएको आरोप लगाएका छन् । नेकपा(एमाले)को भातृ संगठन नेपाल उद्योग तथा व्यवसायी महासंघको कार्यक्रमलाई सम्बोधन गर्दै पूर्व गभर्नर तथा पूर्व अर्थमन्त्री समेत रहेका डा. खतिवडाले बैंक तथा वित्तिय संस्थाहरुले धितो छ भन्दै जथभावी कर्जा प्रवाह गर्न नहुने र हायर पर्चेज(अटो लोन)का क्षेत्र आवश्यकता भन्दा धेरै कर्जा प्रवाह भैसकेको आरोप लगाएका हुन् ।
कार्यक्रममा डा. खतिवडाले भने, ‘यातायात क्षेत्रमा हामीले समितीहरु भंग गर्यौं। कम्पनीमा जानु भन्यौ । त्यतिखेरको सम्पति हस्तान्तरण गर्न भन्यौ । अझै पनि सार्वजनिक यातायात व्यवस्थित गर्नुपर्नेछ । कानुनी पाटो एउटा छ । यस्तै जोखिमका कुरा छन् । बीमाका कुरा छन् । आवश्यकता भन्दा बढी सवारी आयात भयो कि भन्ने कुरा छन् । बैंकिङ कम्युनिटीका साथीहरुलाई म के भन्न चाहान्छु भने तपाईहरुको काम हो । अधिक भन्दा अधिक कर्जा प्रवाह गरिरहदाँ जोखिम के छ हेर्नु पर्दैन र ? यति धेरै हायर पर्चेज कर्जा दिइरहँदा कर्जा तिर्न सक्ने आम्दानी हुने क्षेत्र हो या होइन धितो छ भन्दैमा कर्जा प्रवाह गरिरहने कुरा ठिक होइन ।’
यातायात क्षेत्र पनि सिमेन्ट उद्योग, रड उद्योग, जुनसुकै उद्योगहरुमा पनि सोहि कुरा लागू हुने डा. खतिवडाको भनाई छ । उनले थपे, ‘व्यवसायीहरु बैंकले ऋण नदिए आफ्नै मात्र लगानीले त कति उद्योग धन्दा खुल्छन् र ? यसकारण बैंकहरु अलिकति चनाखो भैदिनु हुन यहि कार्यक्रमबाट अनुरोध गर्न चाहे । जसले गर्दा व्यवसाय धेरै खुल्ने कारोबार कम हुने ऋण तिर्न नसक्ने । यो अवस्था नआओस भन्ने कुरामा हामीले ध्यान दिनुपर्छ ।’
२०८१ असार मसान्तसम्ममा वाणिज्य बैंक, विकास बैंक र वित्त कम्पनीहरुले हायर पर्चेजमा १ खर्ब २४ अर्ब १० करोड २० लाख रुपैयाँ ऋण लगानी गरेका छन् । अटोमोबाइल व्यवसायीहरुको कुम्भ मेलाका रुपमा लिइने नाडा अटो शो आउन तीन दिन मात्रै बाँकी रहँदा प्रधानमन्त्रीका आर्थिक सल्लाहकार डा. खतिवडाकाले यस्तो अभिव्यक्त आएको हो । नाडा अटो शोबाट व्यवसायीहरुले आफ्नो वार्षिक व्यापारको आधा भन्दा बढी व्यापार गर्दछन् ।
बैंक तथा वित्तिय संस्थाहरुले पनि सहुलियत ब्याजदर र किस्ताको सुविधासहित अटो शो केन्द्रित अफरहरु ल्याईरहेका छन् । दशैं, तिहार र छठ जस्ता ठूला चाडपर्वहरुको पूर्व सन्ध्यामा आयोजना हुने अटो शोले नै सुस्ताएको अटोमोबाइल बजारमा प्राण भर्ने अपेक्षा गरिएको छ । तर डा. खतिवडाले भने अटो लोन दिदाँ बैंकहरुले सचेत रहनु पर्ने बताएका हुन् ।
प्रतिक्रिया दिनुहोस्