सिंहदरबार संवाददाता
काठमाडौं । अर्थ मन्त्रालयले सहसचिवहरुको जिम्मेवारी हेरफेर गरेको छ । आइतबार अर्थमन्त्री विष्णुप्रसाद पौडेल र सचिव डा.रामप्रसाद घिमिरेले जिम्मेवारी हेरफेर गरेका हुन् ।
मन्त्रालयले आन्तरिक राजस्व विभाग महानिर्देशकमा रामप्रसाद आचार्यलाई जिम्मेवारी दिएको छ । उनी यसअघि मन्त्रालयकै प्रशासन महाशाखामा रहेका थिए । यसअघिका महानिर्देशक शिवलाल तिवारी मन्त्रालयबाट नै सरुवा भैसकेका छन् । यस्तै, भन्सार विभाग महानिर्देशकमा हरिशरण पुडासैनीलाई पठाएको छ। हालका महानिर्देशक ढुण्डीप्रसाद निरौलालाई प्रतिस्थापन गर्दै पुडासैनी भन्सार महानिर्देशक बनेका हुन्।
मन्त्रालयले दीपक लामिछानेलाई विरगञ्ज भन्सार कार्यालयको प्रमुख भन्सार प्रशासक बनाएको छ । कविता रेग्मीलाई आन्तरिक राजस्व विभागको उपमहानिर्देशक, गोपीकृष्ण कोइरालालाई आन्तरिक राजस्व विभाग उपमहानिर्देशकमा जिम्मेवारी दिदाँ रमेश अर्याललाई ठूला करदाता कार्यालयको प्रमुख कर प्रशासक बनाएको छ । अर्याल यसअघि भन्सार विभागका उपमहानिर्देशक रहेका थिए ।
यस्तै पार्वती शर्मालाई मध्यमस्तरीय करदाता कार्यालयको प्रमुख कर प्रशासकको जिम्मेवारी तोकिएको छ ।
यसैगरी यमुना प्रधानलाई भन्सार विभागको उपमहानिर्देशक, जनकराज शर्मालाई भन्सार विभागको उपमहानिर्देशक तोकिएको छ । डिल्लीराम पन्थीलाई महालेखा नियन्त्रक कार्यालयको सहमहालेखा नियन्त्रकको जिम्मेवारी तोकिएको छ ।
त्यसैगरी उत्तरकुमार खत्रीलाई अर्थ मन्त्रालय राजस्व व्यवस्थापन महाशाखा, मदन दाहाललाई अर्थमन्त्रालय प्रशासन महाशाखा, थानप्रसाद पंगेनीलाई अर्थ मन्त्रालय वित्तीय संघीयता समन्वय महाशाखा, महेश भट्टराईलाई अर्थ मन्त्रालय योजना अनुगमन तथा मूल्यांकन महाशाखा र अमृत लम्साललाई अर्थ मन्त्रालय अन्तर्गतको जिम्मेवारी तोकिएको छ । श्यामप्रसाद भण्डारीलाई महालेखा नियन्त्रक कार्यालयको सहमहालेखा नियन्त्रकको जिम्मेवारी तोकिएको छ ।
यसअघि अन्तर्राष्ट्रिय सहायता समन्वय महाशाखा प्रमुखको जिम्मेवारी धनीराम शर्मा र बजेट तथा कार्यक्रम महाशाखा प्रमुखको जिम्मेवारी श्रीकृष्ण नेपाललाई तोकिएको थियो ।
प्रतिक्रिया दिनुहोस्