सिंहदरबार संवाददाता
काठमाडौं । नबिल बैंक लिमिटेडले अविमोच्य असञ्चिति अग्राधिकार शेयर जारी गर्ने भएको छ । बैंकले पाँच अर्ब रुपैयाँ बराबरको ५ करोड कित्ता शेयर जारी गर्न लागेको हो । बैंकको साउन २७ गते आइतबार बैंकको केन्द्रीय कार्यालय दरबारमार्गमा बसेको सञ्चालक समितिको ६६२ औं बैठकबाट शेयर जारी गर्ने निर्णय भएको हो ।
शेयर प्रतिकित्ता १ सय रुपैयाँको दरले तोकिनेछ । जसमा लगानी गर्ने लगानीकर्ताले वार्षिक ८ प्रतिशत मुनाफा प्राप्त गर्नेछन् । बैंकले कमाएको मुनाफा सबैभन्दा पहिले अग्राधिकार सेयर लगानीकर्तालाई छुट्याउनु पर्नेछ । बैंकले अधिकृत, जारी तथा चुक्ता पूँजी बृद्धि गर्नुका साथै प्रबन्धपत्र र नियमावलीको आवश्यक संशोधन लगायतका एजेन्डाका बिषयहरूमा शेयरधनीबीच छलफल गरी निर्णय गर्नका लागि भदौ १७ गतेका दिन विशेष साधारण सभा गर्ने निर्णय गरेको छ ।
बैंकले यसरी जारी गर्ने शेयर विभिन्न इन्स्योरेन्स कम्पनीहरु, नेपाली सेनाको कल्याणकारी कोष, कर्मचारी सञ्चय कोष, नेपाल टेलिकम, सामाजिक सुरक्षा कोष, नेपाल पुनर्बीमा कम्पनी लगायतले पनि अग्राधिकार सेयर किन्न सक्नेछन् । यस्तै व्यक्तिगत लगानीकर्ताले भने यस्तो सेयर खरिद गर्न पाउने छैनन् ।
नबिल बैंकले आर्थिक वर्ष २०८०/०८१ मा वाणिज्य बैंकतर्फ सबैभन्दा धेरै ७ अर्ब ६ करोड रुपैयाँ नाफा कमाएको छ । यस्तै, राज्यलाई ५ अर्ब ५२ करोड राजस्व समेत दाखिला गरेको छ । अग्राधिकार शेयर जारी गर्नका लागि नबिल बैंक र एनआइशी एशिया बैंकले राष्ट्र बैंक समक्ष निवेदन दिएका थिए ।
राष्ट्र बैंकले बैंकले वाणिज्य बैंकहरुको माग बमोजिम एकिकृत निर्देशन २०८० मा संसोधन गर्दै पुँजी कोष दबाबमा रहेका बैंक तथा वित्तिय संस्थाहरुलाई अग्राधिकार सेयर जारी गर्ने सुबिधा उपलब्ध गराएको थियो । बहुसंख्यक बाणिज्य बैंक, विकास बैंक तथा वित्त कम्पनीहरु पुँजी कोष अभावमा थप ऋण लगानी गर्नै नसक्ने अवस्थामा रहेका थिए ।
राष्ट्र बैंकले सुविधा दिएसँगै बैंक तथा वित्तिय संस्थाहरुले अग्राधिकार सेयर जारी गरेर आफ्नो टायर १ क्यापिटल बढाउन सुरु गरेका हुन् । क्यापिटल एडुक्वेसी फ्रेमवर्कअनुसार बैंकहरूले जोखिम भारित सम्पत्तिको १.५ प्रतिशतसम्म पर्पेचुअल प्रकृतिको नन्–क्युमुलेटिभ अग्राधिकार सेयर जारी गर्न सक्ने व्यवस्था छ ।
क्यापिटल एडुक्वेसी फ्रेमवर्कले अतिरिक्त पुँजी जुटाउने उपकरण जारी गरि पुँजी पुर्याउन सक्ने व्यवस्था गरेपनि बैंकहरूले हालसम्म यो उपकरण प्रयोग गरेका थिएनन् । राष्ट्र बैंकले अविमोच्य असञ्चिति अग्राधिकार सेयरको भुक्तानी अवधि तोकी निष्काशन गर्न नपाइने भनेको छ । बैंक तथा वित्तिय संस्थाहरुले त्यस्तो अविमोच्य असञ्चिति अग्राधिकार सेयर संस्थागत लगानीकर्ताले मात्र धारण गर्ने सुनिश्चित हुने गरी जारी गर्नुपर्नेछ ।
प्रतिक्रिया दिनुहोस्