सुरू गरेका काम सम्पन्न गर्न सरकार प्रतिबद्ध छ : मुख्यमन्त्री कडेँल

कर्णाली । कर्णाली प्रदेशका मुख्यमन्त्री यामलाल कडेँलले सुरू गरिएका काम सम्पन्न गर्न सरकार प्रतिबद्ध रहेको बताएका छन् ।

कर्णाली प्रदेशसभाको दोस्रो कार्यकालको चौथो अधिवेशनको आज बसेको २६औँ बैठकलाई सम्बोधन गर्दै उनले समयमा काम हुँदैन भन्ने भाष्यको अन्त्य गरी थालिएका काम सकिएको विवरण दिने गरी सरकार अगाडि बढ्ने बताएका हुन् ।

मुख्यमन्त्री कँडेलले भने,’व्यवस्था बदलियो, संविधान निर्माण भयो । संविधान राम्रो हुँदा त्यसको सही कार्यान्वयन नहुँदा नागरिकले प्रत्याभूति गर्ने गरी काम भएको देखिदैन । यसतर्फ ध्यान दिनुपर्छ ।’ कर्णालीमा जनशक्तिको व्यवस्थापन र क्षमता अभिवृद्धि गर्नतर्फ सरकारको ध्यान गएको उल्लेख गर्दै उनले प्रदेश लोकसेवा आयोगबाट जनशक्ति व्यवस्थापन गर्न विशेष सहजीकरण गर्ने बताए ।

‘जनशक्ति व्यवस्थापनमा समस्या छ, उपलब्ध जनशक्तिले पनि उत्साहित भएर काम गर्न सकेका छैनन् । त्यसैले काम गर्नेहरूले मुद्दा खेप्नुपर्ने अवस्था आउन नदिने, तोकिएको काम पूरा नगर्नेलाई जिम्मेवारी दिने, मूल्याङ्कनको परिपार्टीलाई व्यवस्थित बनाएर लैजाने पद्धति बसाल्ने र अब काम गर्दा समय मै भुक्तानी हुन्छ भन्ने मानक तयार गर्न मेरो जोड रहने छ’, मुख्यमन्त्री कँडेलको भनाइ छ ।

कानुनी र नीतिगत प्रबन्धमार्फत आगामी योजना बनाइने बताउँदै उनले व्यवस्थित र पारदर्शी योजना छनोट गर्ने पद्धति बसाल्ने र विकास तथा समृद्धिका सपनालाई पूरा गर्न आवश्यक कानुन निर्माण गरिने प्रतिबद्धता व्उक्त गरे । मुख्यमन्त्री कँडेलले संविधानले निर्धारित गरेका अधिकारका विषयमा दुवै तहसँग समन्वय र सहकार्य गरेर अगाडि बढ्ने जनाए । उनले अनियमित विद्युत्को समस्या समाधानका लागि कोहलपुर–सुर्खेतको १३२ केभी प्रसारणलाई व्यवस्थित बनाउन सहजीकरण गर्ने बताए ।