तयारी नपुगेको भन्दै रोकियो मौद्रिक नीति, कारण बने अर्थ सचिव

काठमाडौं । नेपाल राष्ट्र बैंकले आज सार्वजनिक गर्ने भनेको मौद्रिक नीति रोकिएको छ । चालू आर्थिक बर्षको मौद्रिक नीति पास गर्न भन्दै बिहान ८ बजे संचालक समिती बैठक डाकिएको थियो ।

तर संचालक समितिमा तयारी नपुगेको भन्दै आजलाई मौद्रिक नीति सार्वजनिक गर्ने कार्यक्रम स्थगित भएको छ । ‘आज मौद्रिक नीति ल्याउने भन्ने थियो, बोर्डमा तयारी नपुगेको भन्ने निष्कर्ष आएपछि आजका लागि सम्भव भएन’, राष्ट्र बैंक श्रोतले सिंहदरबारसंग भन्यो ।

बिहिबार गभर्नर महाप्रसाद अधिकारीले मौद्रिक नीतिबारे अर्थमन्त्री बिष्णु पौडेललाई ब्रीफिङ गरेका थिए। मन्त्री पौडेलले भने नयाँ अर्थ सचिव आएपछी मात्रै मौद्रिक नीति ल्याउन गभर्नरलाई निर्देशन दिएको श्रोतले बतायो ।

अर्थमन्त्री पौडेलले केही दिन भित्रै अर्थ सचिव फेर्ने र आगामी हप्तामा मौद्रिक नीति ल्याउने वातावरण बनाउने वचन गभर्नरलाई दिएका थिए । मन्त्री पौडेलले अहिलेका अर्थ सचिव मधु मरासिनी रहुन्जेल कुनै ठुलो निर्णय नलिने बताउदै आएको श्रोतको दावी छ ।